الاسلام فيه :
تقطع الايدي والارجل من خلاف
الرجم حتى الموت
الجلد
قطع اليد …………….
ولسة فيه جوايز
———————————
خارج الموضوع :
قريت مقالة جامدة جدا عن تصنيع اول كائن صناعي في المعمل من البكتيريا
لكن بقت خطوة تخليق الحمض النووي من المواد الكيميائية كربون وهيدروجين لو اتحلت دي مش حيتبقى عند الدينيين حجج
شفت فيلم عن قصة حياة داروون اسمه creation
قال فيه ان الرب ماعدش ينفع يزعم انه خلق كل اشكال الحياة دي
ولو انهدم الاساس حتنهدم الطقوس تماما
مفتقداك ياعم طوني بتابع كتاباتك دايما واكيد بحبها كلها
طارق
يعني بدك تصير تعبد الشجر مثلاً؟
ولا بدك تعبد الهواء ولا المي ؟
:S لول
ما بعرف ليه خطر عبالي سد هارتا، اقرأ الرواية لو ما كنت قارئها
هبة
لم أر ديناً أكثر رحمة من الاسلام عزيزتي. يعني لو تحطي كل الأديان سوا عكفة ميزان والدين الاسلامي لحال رح تشوفي الكفة الراجحة هي للإسلام. ما بعرف يعني بس قريت كتير بالمسيحية واليهودية وبشغلات تانية وكلهم فيهم نقص ومش منطقيين والعقل ما بتقبلهم. بتكفي جملة : اطفئ سراح عقلك واتبعني، الدين اللي بالنسبة الو العلم والعقل عاهة ما بلزمني. وبكفي انو المراة عندهم ما عندها حقوق. لا ألوم اللي من هيك ديانات بس يصيروا لادينيين . هي حالة طبيعية نتيجة وجود اللامنطفية.
والقانون البشري اصلا بعاقب الناس اللي بتغلط بالمجتمع، فهل بدك القانون الإلهي يعني يقول للناس ساووا شو ما بدكن، ما حدا حاسبلكن حساب. لماذا خلقنا في الأساس ؟ إن لم يكن للحياة معنى فهنالك خطأ كبير في وجودنا على هذه الحياة .
الناس البتخاف من العقوبة هي الناس المش واثقة من حالها.
طوني
ما حلو الكاريكاتور. يعني حسيتو اهبل 😀 يعني مش مشغول صح 🙂
بس فيك توضحلي كيف سقطت الاديان علمياً قبل ما تسقط أخلاقياً ؟
ما تجيبلي دليل عن فرضيات تصنيع خلية. بدي معلومات أكيدة يعني اشيا صارت . طبعاً بهمني من كل الموضوع الدين الاسلامي لانو باقي الديانات سقطت زمان .
مسا الخير كوفية،
بتمنى تكون احوالك بخير وكل شي منيح.
اسمحيلي اختلف معك على رأيك بالأديان. بالنسبة الي، لحتى نقول عن دين ما دين رحمة لازم يكون فيه شروط معينة مش متوافرة بالاسلام، وللصراحة بحالة الاسلام العكس تماماً هو الموجود. جوهر فلسفة الإسلام كدين هي اللارحمة – وحقك تخالفيني بالرأي – لأن الإسلام أولاً قائم على تصنيف البشر إلى مراتب بناء على قناعاتها: مؤمن مسلم ذكر له كامل الحقوق، مؤمنة مسلمة أنثى لها نصف حقوق، مؤمن كتابيّ له ربع حقوق، غير مؤمن لا حقوق له، وأخيراً الكفار والمشركين والزنادقة الذين يجب قتلهم.
خلّينا نبلّش من الجدّ، كيف ممكن يكون دين تسامح وانا لأن اسمي طوني بكون فيه ابن ذمّة، وبوطني وبأرضي؟ وكيف بيكون دين تسامح اذا إله هالدين نفسه هوايته حرق الناس في النار بسبب قناعاتها؟ وكيف بيكون دين تسامح اذا رسوله كان قائد عسكري وسيفه ملطّخ بالدماء؟ كيف ممكن يكون دين تسامح وفيه شي اسمه حدّ الردة؟ وكيف ممكن يكون دين تسامح والمرأة فيه ممسحة؟ وكيف ممكن يكون دين تسامح ويجيز زواج البنت لمن تبلغ التسع سنوات؟ ووين التسامح لمن يكون هناك آيات في القرآن عن قتال المشركين والمرتدين واهل الكتاب أكثر من الآيات اللي بتدعي للسلام معهم؟ وكيف بيكون دين تسامح اذا الرسم والنحت تهمة وعقوبة المصوّر والنحّات هي العذاب الأبدي بجهنّم؟ ووين التسامح بدين يعتبر صوت المرأة وشعرها عورة، وبيعتبر الفنّ حرام، وبيعتبر التفكير ممنوع والتسليم ممدوح؟
المرأة بكلّ الأديان عندها حقوق أكثر من الحقوق الموجودة بالاسلام واليهودية، لكن طبعاً هذا مرتبط بنظرتك لحقوق المرأة لأن اذا كنتي بتشوفي انوا المرأة لازم تقعد بالبيت تكنّس وتطبخ وتكون أداة انجاب فقط، فطبعاً الإسلام هو مع هذا النوع من الحقوق.
وكل اللي حكيته هلق موجود بالقرآن مش عم بخترعه من عندي.
وخلّينا كمان نعدّ كمّ مرّة مارقة كلمات متل حرّية وتسامح بالقرآن وكم مرّة مارقة كلمات متل اضرب وجهنّم والكافرين ونكاح، ورجعي خبريني اذا التسامح هو فعلاً جوهر الرسالة الإسلامية أو مجرّد جملة مارقة فيها بالصدفة.
أما بالنسبة لطبيعي يصيروا لادينيين من الأديان غير الإسلامية، فيا صديقتي معظم اللادينيين والملحدين بالعالم العربي، الإسلام هو سبب إلحادهم، وشوفي هالموقع اذا بتحبّي تعرفي عن هيك ناس أكتر: http://wake-up-arab.blogspot.com/
كمان يا صديقتي، وبتمنى تتقبلي رأيي بمحبة، من ناحيتي نحنا مش بحاجة لآلهة بتوشوش رجال في الصحراء لنعرف شو معنى الحياة، عنّا عقل وعنّا علم وعنّا فلسفة ومنقدر نكتشف بأنفسنا من دون كتب بتخبّرنا انو قطعة قماش هيي الفرق بين العفة والدعارة.
أما أخيراً، تحدثت عن سقوط الاديان السماوية أخلاقياً قبل سقوطها علمياً، الأديان صارت عبء وكذبة كبيرة ومصدر لمعاناة ملايين البشر، مصدر للتمييز ولنشر الأحقاد وتربية الكراهية عند الأطفال من هنّي وصغار، مصدر لكره الذات وكره الآخرين واحتقار المرأة، ومصدر لتبرير تسلّط الأنظمة وهبل رجال الدين، الأديان السماوية اليوم وخاصة الاسلام هي مصدر لأمور كتيرة، 5 % منها على الأكثر هو إيجابي والـ 95 % الباقيين ويلات ومصايب.
أما السقوط العلمي، ففيكي تبلّشي من أسطورة الخلق ونزولاً، مروراً بشقّ القمر وفوائد جناح الذبابة وبول البعير ودوران الشمس حول الأرض والسماء الصلبة والجنّ واعتقاد القرآن أن النجوم مصابيح معلّقة في السماء لإنارة الأرض في الليل واعتقاده ان الجبال هي عواميد لمنع السماء من السقوط على الأرض (واذا حابة فعلاً تبحثي، فيكي تبدأي بهالمعلومات اللي عم بحكيها وتتأكدي منها).
وبالنسبة لتصنيع الخلية ، هيدي مش فرضية يا صديقتي، هيدا خبر موجود اونلاين اذا بحثتي على غوغل بتلاقيه.
وبالمناسبة، اذا باقي الديانات سقطت يعني الاسلام سقط معها، لأن هوّي بيدّعي انها صحيحة وانو هوّي اجا كخاتمة وتكملة لها.
الأديان سقطت من زمان، وباقي الدفن.
طوني بعتذر على ردي بس لازم تتقبلو.
انت متلك متل كتير اشخاص. مفهومها عن الدين الاسلامي قاصر جداً. الدين الاسلامي أبعد ما يكون عن الأمور اللي ذكرتها يا طوني الله يهديك .
1- فيك تشرحي قاعدة الحقوق هاي؟ اول مرة بسمع فيها. المرأة بالاسلام حقوقها متل حقوق الرجل. الذمي في الاسلام نفس الشي. كيف اختلف الامر معك ؟ من وين دليلك فيني اعرف ؟
2- الاسلام ما عمرو نادى بقتل الكفار. الاسلام بيقتل كل معتدي عليه. شي طبيعي ازا اليهود اجوا واغتصبوا ارضي ادافع عنها، من هالمنطلق اي حد بيهجم علي رح دافع عني وعن الارض . وأبو بكر رضي الله عنه أوصى يزيد بن أبي سفيان لمن بعثوا على الشام وقلو : وإني أوصيك بعشر : لا تقتلن امرأة، ولا صبياً، ولا كبيراً هرماً، ولا تقطعن شجرا مثمراً، ولا تخربن عامراً ولا تعقرن شاة ولا بعيرا إلا لمأكله، ولا تحرقن نخلاً ولا تغرقنه ولا تجبن ” . تاني شي في شروط للحرب بالاسلام . 1) تحريم قتل غير المقاتلين، يعني ازا انت هلا بتشوف ناس بتقاتل ناس مدنيين باسم الاسلام فاعلم ان الاسلام بريء منهم. ازا كل واحد اجا وقلك انا مسلم بس و الله بعمل وبعمل فهاد مش صحيح. ازا بدك تعرف الدين عنجد بتقرأ عنو . 2) تحريم التخريب والتدمير لأموال العدو. 3) تحريم اسخدام وسائل الابادة. وطبعاً الحرب ما بتبدا الا ازا الاخر بدأ. هل هذا ينفي سماحة الاسلام ورحمته ؟ ولا بس انت بتمسك جزئية معينة وبتنسى الباقي ؟ أين الموضوع يا طوني ؟
3- إله الدين هو إله الأديان الأخرى ولا انا غلطانة؟هوايته حرق الناس؟ طب سوري ليه الله خلقك؟ ليه انت مخلوق؟ ازا ما في هدف من الخلق ففي مشكلة بوجودنا. كون وجودنا من دون هدف بيعني انو نحنا مخلوقين عبث وعن طريقة غلطة . هلا وئت تكون انت عليك امتحان ورسبت فيه لأنك ما درست بحقلك تروح تسأل ليش المعلم ظالم وليش اعطاك علامة سيئة ؟ انت ما خُيرت انت تدخل المدرسة . اهلك فوتوك اياها لمن كنت صغير. اي شخص يخالف الصواب فهو يعاقب هاد شي طبيعي . مش هواية هاي . بعدين لازم تعرف شغلة مهمة بالدين انو بالنهاية مش كل الناس حتضل بالنار. المسلمين اللي دخلوا النار رح يرجعوا على الجنة وهكذا .. يعني كل شخص بكون الو فترة عقاب معينة. النار مش أبدية . وشي طبيعي انت تتعاقب. بالنسبة للديانات الاخرى ما عندي علم عم بحكي عن كون الفرد مسلم ودخل النار. وبالمناسبة ليس فقط المسلمون من يدخلوا الجنة. مش شرط يعني الواحد يكون مسلم ليدخل الجنة فيه كتير ناس ما وصلها الدين الاسلامي، معقول هاي تروح على النار ؟ في ناس بإفيريقا ما بتعرف انو في الله اصلاً. في ناس عملت انجازات وغيرت مجرى التاريخ وانقذت أمم. في الاسلام الجنة ليست حكراً على المسلمين ، أليس هذا من سماحة الاسلام؟
4- طيب المقاومة بفلسطين هلا بغض النظر عن دينها، هدول خلينا نقول مش سيوفهم ملطخة بالدماء ؟ مش بقاتلوا؟ ليش بقاتلوا؟ لو الرسول بهموا فعلاً القتال كان لمن راح على الطائف اخد معاه سيف وقتل الناس والاطفال اللي رموا عليه حجار. وسبق وذكرتلك فوق شو هي قواعد الحرب بالاسلام . وهنالك بواعث للقتال متل رفع الاعتداء عن المسلمين ، يعني متل لمن اليهود يهاجموا فلسطين هون في حق بالقتال بالاسلام،
5- حروب الردة ليش ؟ حروب الردة لا تأتي عبثاً. اول شي لازم الواحد تتم استتابتو وإن لم يستتاب يتم قتله وهذا يخضع في ظل دولة تابعة لنظام اسلامي مش متل هلا،وفيك تشوف شو صار بالزنادقة ايام الدولة العباسية وكيف انهم ضلوا يعبروا عن رأيهم فترة طويلة وما حد قلهم شي. ليش حروب الردة؟ لانو الدين مش لعبة. حبيت الدين اهلا وسهلا بس حابب كل يوم تكون بدين شكل هاد بدل على انو الشخص بعاني من الانفصام . يعني الدين مش للتجريب او اللعب.
6- الاسلام يا طوني ما بييجي بقلك اطلع من بلدك بدها تصير بلدي ورح تصير انت ذمي فيها. بعتقد هيك حكي فيو يتطبق على الرحلات الاجنبية لأميركا لمن فتحوها قصدي سرقوها.
7- هل المرأة في الاسلام ممسحة ؟ يعني قصدك انا ممسحة ؟ لول انا بنت ومسلمة وعندي كامل حقوقي. لا ابوي ولا اخوي بيتدخلوا فيا. وعندي حرية كاملة، بعمل اللي بدي اياه ما حد بسألني ليش وكتير بخالف أبوي بالرأي عشغلات كتير ويمكن نسبة كبيرة منها دينية او يقال بأنها دينية واانا بشوف العكس وبشوفها غير منطقية بس ما حد بقلي ليش لأنو بالاخر هاد رأيي وانا اللي رح اتحاسب. المرأة بالاسلام بتاخد ميراثها كامل متلها متل الذكر. وبديانات تانية المرأة اصلا تعتبر شيطان ونجاسة في حين ان الاسلام ينظر للمراة على انها الماسة يجب أن تُصان.
8- من أخبرك أنه يسمح يزواج القاصر؟ لماذا لا تقوم بقراءة الدين أكثر مادمت مهتماً بالمعرفة عنه ؟بنات زمان مو متل بنات اليوم. الشافعي كان يفتي وهو عمره 15 سنة. هلا فيك تقلي انو ابن 15 سنة فيو يحكي كلمتين راكزات ؟ وعائشة رضي الله عنها لمن اتزوجت ع التاسعة كانت قد بلغت. فيك تقلي اني اللي بتبلغ هالايام على عمر ال 9 سنين ؟ عدا عن انو بهداك الوقت البنت غير. والاسلام دين متطور وليس ثابت متل اديان أخرى. يعني هالايام شي طبيعي ومنطقي البنت لا تتزوج على التاسعة ولا حتى على الخامسة عشر وازا في عيل بتعمل هيك فهي اللي بتاخد الاثم لانو هاد حرام . وعلى سيرة زواج القاصر بطلب منك تراجع احصائيات وتشوف نسبة انجاب البنات اللي تحت السن القانوني بأميركا وبالبلاد العربية. انا شفت بعيني الاحصائية. وبأميركا كانت أكتر بكتير. ولا ليكون بحق للبنت تحمل تحت السن القانوني وما بحقلها تتزوج وانا مش عارفة ؟
9- الرسم والنحت والتصوير مش حرام. فيه مقال كتبو الشيخ القرضاوي فيك تقراه.الحرام بكون في شغلات بسيطة فيهم وعفكرة الموسيقا مش حرام كمان. الامور الشائكة في الاسلام كتيرة وهذا من سماحة الاسلام ويسره وسهولته كمان. الموسيقا عليها خلاف كبير وحتى الغناء. وانا بتبع الرأي اللي بقول انهم حلال مادام لا يوجد كلام فاحش. الحلو بالاسلام انو واسع وغير محدد. ما بقلك امشي 1 2 3 ، بقلك هي الأرقام رتبها كيف ما بدك : )
10- مين قال انو صوت المرأة عورة؟ طوني نفسي اجي وافركلك دانك : ) . مين قلك هاد الحكي فهمني ؟ صوت المرأة مش عورة. لو صوت المرأة عورة ما كان بنحكي مع الدكاترة بالجامعة، ما كان بنتصل تلفونات، ما كان بنحكي مع قرايبنا، ما كان ما كان … صوت المرأة مش عورة. بصير صوت المرأة عورة عند الخضوع في القول يعني متل تقعد تتنغج للشب وهوي ما بمتلها بصلة. الآية القرانية ذكرت الخضوع في القول بس لهيك ازا حد قلك هالحكي فهوي فاهم الدين بالشقلوب وعم يمشي على عادات وتقاليد تالفة.وعفكرة في ناس كتير عندها اسمالمرأة حرام وعيب وهي مسلمة رغم اننا كلنا بنعرف اسماء زوجات الرسول. شوف التناقض واللامنطقية بين الدين والتقاليد !
11- شعر المرأة عورة؟ كيف يعني ؟ المرأة المسلمة لازم تكون محجبة.
12- الفن مش حرام، سبق وكتبت رد سابق وفيك تشوف فتوى ومقال الشيخ القرضاوي. الفن بصير حرام لمن يصير خلاعي وساقط. وبعتقد اخلاقياً هيك فن مش مقبول.
13- الاسلام هو الدين الوحيد اللي نادى بالفكر وبالعلم. بالمسيحية شو بقولوا؟ مش بقولوا اطفئ سراج عقلك واتبعني؟ ولا انا غلطانة ؟ بدك عدلك كم كلمة العقل موجودة بالقرآن ؟ بدك عدلك كم كلمة الفكر موجودة بالقرآن ؟ كم كلمة أولي النهى أو الألباب موجودة بالقرآن ؟ كم من عالم مسلم كان بالزمنات؟ كيف كانت الحضارة الاسلامية زمان ؟ شو سر هالنهضة ؟ مش الاسلام ؟ عمرك قرآت القرآن يا طوني ؟ أو عمرك قرأت عن تاريخ علماء المسلمين ؟ بدي اطلب منك طلب. عد كم موجودة كلمة الفكر بالقرآن وكلمة الفكر بالتوراة او الانجيل. رح تنصدم بهيك عدد . طبعاً برجع وبقول انو الدين الاسلامي دين متطور، يعني ممكن شغلات مشيت زمان ما تمشي هلا او تمشي بطريقة أخرى. وفي آيات قرآنية بالمناسبة نزلت بفترة معينة لسبب معين وبعد فترة اجت ايات تناقضها او تغير الحكم فيها او توقفوا،يعني هيك موضوع بحاجة لقراءة متمعنة للقرآن الكريم وحلو تجيب كتاب تفسير فيك تجيب تفسير ابن كثير. يعني مثلاً لو فكرنا بعقلنا ، في حديث واضح وصريح عن تحريم الشرب بأواني الخمر. ماشي ؟ التحريم كان في ذلك الوقت لانو كانوا يشربوا الخمر زمان، وكانوا جديد داخلين بالدين فخوفاً من رجوعهم لشرب الخمر قبل ذاك الحديث. لكن لو حبيت انا اشتري هلا اواني خمر، وين المشكلة بالموضوع؟ ما في أدنى مشكلة . الواحد بفكر بعقلو يعني . لانو وقتي بختلف عن زمان ولأني ما شربت خمر بحياتي وما بعرفو.
14- طيب ما دامك عم بتقول المرأة حقوقها بالاسلام اقل شي فيك تجيبلي دليل ؟ مين قال انو المرأة لازم تقعد بالبيت ؟ المرأة فيها تكون عالمة وتشتغل وتعمل اللي بدها اياه. مصاريها وهي حرة فيهم، بغير ديانات مصاريها ما بتقدر تتصرف فيهم. بغير مجتمعات يُنظر للمرأة على انها نجسة او شيطان او أداة للمتعة بس. لكن هاد مش بالاسلام. الرسول كان ياخد رأي نساؤوا بكتير شغلات بس ازا هلا الرجال قامعين النساء فهاد ما بيعني انو الدين حكى هيك. المشكلة بالتطبيق مش بالدين. بتمنى تجيبلي ادلة فيها المرأة اللي من ديانة تانية حقوقها كاملة عشان دغري اغير ديني ازا هيك . بتمنى تكون نصوص دينية مدام الادلة من الديانات.
15- طيب فيك تجيبلي كم مرة مرقت كلمات متل فكر وعلم وحرية وتسامح وكم مرة انذكرت كلمة نكاح او اضراب؟ انا ما عديتهم لحتى اعرف حابة اعرف عنجد. ما بتذكر انو نكاح مذكورة بهالزخم يعني. بعدين سوري يعني هو الجنس عيب لحتى ما ينذكر بنص قرآني ؟ الجنس غريزة طبيعية. ما بعرف لو قرأت 1984، بس انت بكلامك هاد متل كأنو بتقول انو الجنس حرام او خلص مرة بالسنة وبكفي متل ما كان يعمل الحزب بال رواية.
16- شفت الموقع زمان بس ما عجبني. كل اللي فتحت على بلوجاتهم ناس بس حابة تعمل هالة حولينها وتقول هيني تعالوا اتفرجوا علي انا ما بآمن بالدين الفلاني. بدكن تكتبوا عني بالجريدة متل مدعي الالوهية؟، في ناس عندها مرض نفسي بيجي بمرحلة من المراحل بتصير تقول انا صرت لاديني او صرت بوذي او ما بعرف شووهو بكون بس هيك عم يتهبل، شوف صفحة البوذي اللي بقول انو خليجي. يعني بادي الحكي ببداية متخلفة ، انو بقول : معقول حد يصدق انو خليجي واماراتي بوذي. شو هالهبل؟ شو اعملك يعني ازا انت اول خليجي على رأيك بصير هيك؟ نساوي حفلة رقص يعني؟ اللي بدو يثبت انو هوي فعلاً صار لاديني نتيجة شي معين ما ببدا هيك بداية تافهة !
17- ما بعرف مين قال انو العفة هي بغشاء او بقطعة قماش. المشكلة بتصير لمن العادات والتقاليد تختلط مع الدين بطريقة غلط. في كتير بنات بينولدوا من دون غشان وبيفقدوا غشاءهم نتيجة رياضات عنيفة، هلا هدول صاروا مش عفيفين؟ برأي التقاليد بتكون عاملتلها شي عملة برأي الدين البنت عفيفة.
18- يعني انت بتصدق انو انت كنت قرد زمان ؟ سوري يعني بس مش قادرة استوعب انا، مش آدم هوي اول انسان اجا عوجه الارض؟ صحيح يمكن شكلو بيختلف بس ما كان حيوان ! كان انسان يا طوني . شق القمر صحيح وين الغلط فيو؟ عالم الجن موجود وانا بعتبروا مرات عالم موازي النا بس ما النا دخل فيو. هيدا رأيي يعني، وبعدين الاية اللي بتقول ” وبينهما برزج لا يبغيان ” عن البحر والنهر انهم ما بيختلطوا، هيدي وين مكانها من الاعراب؟ مش دليل قوي على انو القرآن كتاب منزل؟ والايات اللي بتحكي عن كيفية تكوين الجنين، هيدي مش دليل؟
قرأت عن الخلية زمان بس بعتقد الموضوع لا يزال غامض على الأقل بالنسبة لدي. والاسلام صحيح اجا مكمل لباقي الديانات بس اجا مكمل للديانات الصحيحة، مش الديانات المحرفة.
بعتقد يا طوني وما تزعل مني انو لازم تقرأ اكتر عن الدين الاسلامي ليصير عندك نظرة شاملة عنو.
_
لو انت فعلاً شايف انو الدنيا من دون آلهة افضل فهاد الشي بيرجعلك. يعني ازا انت مرتاح بالعكس رح كون مبسوطة الك. بس ما بحقلك تطعن بدين من الأديان بطريقة خاطئة. الدين الاسلامي ما بينفهم من مجرد قراءة كلمة من هون او كلمة من هناك. هاد الشي بيعملوه المستشرقين مو انت يا طوني وما بحقلك الا انك تكون موضوعي بهيك شي. وتقرأ عن موضوع معين بشكل كامل.
و الله يعينك ع قراءة ردي الطويل 🙂
أكيد بتقبّل ردّك وما الي خصّة شو رأيك الشخصي، لكن كمان يا صديقتي ما الك حقّ تقوليلي فهمي للإسلام قاصر وتحولي الردود لردود شخصية، لأن انا متأكد اني بعرف أكتر من القرضاوي، وبكل غرور، لأن بالنهاية الاسلام مش طلاسم ما بيقراها إلا المعمّم، الكتب والتاريخ موجود بين ايدينا يا كوفيّة وعنا عقول منعرف نقرأ عبرها.
الردّ على النقاط اللي ذكرتيها حضرتك بيستوجب موضوع كامل، ما بعرف اذا انتي مقتنعة فيها عنجد. المرأة متساوية مع الرجل والذمي متساوي مع المسلم بالإسلام؟ شو بعد بدّي ردّ بعد هالخبصة؟
كمان عادة ما بناقش شخص بيعتبر انو فهمي قاصر لأن هيك بلّشتي النقاش بقلّة احترام لعقلي ولمعرفتي، بس ماشي الحال.
2- كيف القرآن لم يدعو لقتال الكفار؟
وهالآيات من وين جايي؟ دارسها وحدة وحدة وكلها آيات غير شرطية، يعني غير مقيدة بمكان وزمان:
– قَاتِلُوا الَّذِينَ لاَ يُؤْمِنُونَ بِاللَّهِ وَلاَ بِاليَوْمِ الآخِرِ وَلاَ يُحَرِّمُونَ مَا حَرَّمَ اللَّهُ وَرَسُولُهُ وَلاَ يَدِينُونَ دِيْنَ الحَقِّ مِنَ الَّذِينَ اُوْتُوا الكِتَابَ حتى يُعطوا الجزية عن يدٍ وهم صاغرون ( التوبة/29 ).
– يَا اَيُّهَا النَّبِىُّ جَاهِدِ الكُفَّارَ وَالمُنَافِقِينَ وَاغْلُظْ عَلَيْهِمْ وَمَأْوَاهُمْ جَهَنَّمُ وَبِئْسَ المَصِيرُ (التوبة/73) .
– “واقتلوهم حيث ثقفتموهم وأخرجوهم من حيث أخرجوكم والفتنة أشد من القتل”. (سورة البقرة الآية 191.)
– و”فليقاتل في سبيل الله الذين يشرون الحياة الدنيا بالآخرة ومن يقاتل في سبيل الله فيُقتل أو يَغلب فسوف نؤتيه أجراً عظيماً”. (سورة النساء، الآية 74).
-“سألقي في قلوب الذين كفروا الرعب فاضربوا فوق الأعناق وأضربوا منهم كل بنان”. (سورة الأنفال آية 12).
– “فإذا لقيتم الذين كفروا فضرب الرقاب حتى إذا أثخنتموهم فشدوا الوثاق فأما منّاً بعد وأما فداء حتى تضع الحرب أوزارها”. (سورة محمد الآية 4).
– “فإذا انسلخ الأشهر الحُرم فاقتلوا المشركين حيث وجدتموهم وخذوهم واحصروهم وأقعدوا لهم كل مرصد فإن تابوا وأقاموا الصلاة وآتوا الزكاة فخلوا سبيلهم إن الله غفور رحيم”. (سورة التوبة الآية 5).
3- أما قصة الإله هو إله كل الأديان فاسمحيلي ما وافقك، يمكن الإله الابراهيمي الغيّور والغاضب هو نفسه باليهودية والمسيحية والاسلام فقط، إله بيغضب اذا الواحد شرب وبيغضب اذا الواحد ما سجدله وبيغضب اذا الواحد فطر وبيجيز زواج بنت التسعة، شو هالاله المعاق هادا.
وبالنسبة لتساؤل الجنة والنار اللي حضرتك حكيتيه عنّك، يا كوفية هادا اللي انتي بتحكيه مش اللي بيحكيه رجال الدين اللي عم تستشهدي بأقوالهم.
4- أما تشبيه المقاومة بفلسطين بتكتيكات الرسول الحربية، فمش زابط، لأن المقاومة هيي مقاومة مش نبي جايي يدعي الناس للرحمة وحامل بالايد التانية سيف. بعدين اذا قارئة التاريخ الإسلامي منيح، بتعرفي انو الرسول نفسه خرق قواعد الحرب الاسلامية، والجيش الاسلامي قام بقتل أسرى، وقام باغتيال شعراء ومنهم نساء وشيوخ، فضلاً عن قيامه بسبي النساء وأخذ الناس كعبيد. راجعي السيرة.
5- تبرير حروب الردّة عندك بيبرهن وجهة نظري. الدين مش لعبة، الدين كذبة، وما حدا الو حقّ يحاسب التاني اذا قرّر بيوم من الايام ما يآمن فيها.
6- مبلى بيقلّي.
7- المرأة في الإسلام هي ألماسة ومش نجاسة؟ لكان تفضلي خبريني ليش تعدد الزوجات وليش الحجاب وليش فكرة العورة وليش شهادتها نصف شهادة رجل وليش نصف ميراث وليش ما فيها تصلّي اذا بدورتها الشهرية؟ اذا ألماسة ليش ما فيها تكون رجل دين؟ وليش الزواج هو صفقة تجارية؟ وليش على التسع سنوات بيجوز زواجها؟
8- هادي وجهة نظرك انتي يا كوفية ومش وجهة نظر غالبية رجال الدين.
9- الرسم والنحت حرام اذا موضوع الرسم هم حيوانات أو ناس، والقرضاوي من المحرّمين، لأن ما بيقدر يتخطّى القرآن بهالموضوع. الموسيقى مش حرام عند الكل، لكن كل رجال الدين عندهم اجماع على كراهيتها والتحذير من “مخاطرها”.
10- تفركيلي دينتي؟ انتبهي شو عم تحكي يا كوفية احلى ما يطلع منّي كلام ما رح تحبّيه. ممنوع المرأة تغنّي، روحي اتأكدي من النصوص والفتاوى وكل الاجتهادات، وفيها كلها ممنوع المرأة تغنّي لجمهور من الرجال، تأكّدي وارجعي ردّي عليي خبر.
13-الإسلام بينادي بالعلم؟ : )
فيه يبلّش بقبول نظرية النشوء والارتقاء لكان.
بعدين لمن يكون فيه عنّا آيات قرآنية بتنقض آيات تانية، يعني بتسقط عن القرآن ككل فكرة انو صالح لكل زمان ومكان، لأن بتدلّ على ضرورة التطوّر مع الزمن.
14- مين قلّك بدّي تغيري دينك؟ ومين قلّك بغير أديان المرأة عندها حقوق أكتر؟ الإله الابراهيمي عندو عقدة نفسيّة فيما يتعلّق بالمرأة، لازملو طبيب نفسي للعلاج، لكن للأسف فيه أديان على شاكلته وورثت منه نفس المشكلة. وهالنقطة مكررة. حلوة هيدي، المرأة لازم تكون محجبة، لازم تكون مطيعة، فيه الرجل يتزوج عليها، وفيه يحرمها من الوراثة ومن أطفالها، وفيه يطلقها ساعة اللي بدّو، واذا راحوا على المحكمة شهادتها نصف شهادة، ومنرجع منقول عندها حقوقها كاملة.
15- مين قال الجنس حرام؟ بس عم بلفتلك نظرك انو كلمة نكاح مارقة أكتر من كلمة حرية، وهيدي بتدلّ على نفسية كاتب النصّ وعلى شو كان مركّز بالحياة.
16- مين انتي لتصنفي الناس؟ شو الك معهم اذا بوذيين أو ملحدين أو وثنيين؟ بيضلّو احلى بكتير من اللي حاملين عصاية الدين ولاحقين العالم فيها.
17- بتعرفي شو، هات لنزتّ كل شي فينا سيء على العادات والتقاليد، ونتوهّم انو كل شي منيح هوّي بالدين، ونتظاهر كأن التنين مش مرتبطين ببعض.
18- مش بس كنت قرد، كنت فيروس صغير، وهادا العلم اثبته، اذا انتي مش مصدّقة مشكلتك لكن العلم انهى النقاش فيها. أما بالنسبة لعالم الجنّ موجود، فحظ موفّق بالاتصال فيه.
والآية اللي عن الجنين تم اثبات أغلاطها بالمناسبة، لازم تجتهدي أكتر بالبحث وتعتمدي على مصادر غير زغاليليو النجّار.
بعتقد يا كوفية انو مش حقك تفترضي كل واحد مش من رأيك يعني معرفته قاصرة، يمكن يكون بيعرف أكتر منّك بكتير ويمكن يكون بيعرف أقلّ، لكن بدّك تتقبّلي فكرة انو فيه ناس تانية عندها رأي مختلف عنّك.
كمان ما تزعلي منّي، لكن ردّك فيه قلّة احترام لأنك افترضتي اني جاهل لمجرّد اني بختلف معك بالرأي.
ولأني صديقك عم بتمنى انك توصلي بيوم ما لمرحلة أفضل بتقبّل غيرك.
وبالنهاية، خلّيني خبرك انو الاديان راحت واجت ونحنا بقينا، الناس اللي عقولها حرّة واللي ما خدعوها الأنبياء، كنّا موجودين قبل الأديان السماوية، وضلّينا موجودين معها، ورح نبقى موجودين بعد انتهائها، ونهايتها قريبة.
صباح الخير
مش عم حولها لشي شخصي انا أبعد ما يكون عن هيك أمور اللي بسمعك بفكر انو انا واياك متخانقين. انت بتعرف اني بحترمك كتير . ومستحيل فكر بهيك شي.ولو يا طوني يعني 🙂
بس كتير بنقهر وقت تاخد جانب وماتاخد جوانب أخرى. كان قصدي وين الموضوعية يا طوني؟ يعني بتجيب آية بتحكي عن القتال بس في آيات بتحكي عن السلم ليه ما ذكرتها ؟ في بواعث للقتال ليه ما حكيت عنها؟ في اسباب للقتال ليه ما ذكرتها؟
اكيد الاسلام مش طلاسم. بس الاسلام فاتح باب الاجتهاد. هيدا قصدي.
1- مش خبصة. بس فهمني كيف يعني فيه حقوق اقل من حقوق؟ يعني من اي ناحية انا ما قدرت استوعب؟ يعني حدد الجانب اللي بتحكي عنو بالحقوق عشان اقدر استوعب؟ انا بعرف حقوق الذمي كاملة بالدولة الاسلامية. بحقلو يبيع ويشتري وبحقلو يشرب خمرة وياكل لحم خنزير وبحقلوا يتملك وكل شي بمارسوا ضمن نطاق دينو بمارسوا بالدولة الاسلامية وفس ادلة كتير متل : ( من آذى ذمياً فأنا خصمه ) ( من قتل معاهداً بغير حق لم يرح رائحة الجنة ) ( أوصيكم بذمة الله فإنه ذمة نبيكم و رزق عيالكم ) ” لا إكراه في الدين ” ( أموالهم كأموالنا ودماؤهم كدمائنا ) وكتير ادلة غيرها لو احكي من هون للصبح ما بخلص فكيف حقو منتقص؟ والمرأة بحقلها تتملك وتورث ومتساوية في الكرامة الانسانية مع الذكر. ومطلوب من زوجها يعاشرها بالمعروف وينفق عليها الخ الخ الخ. بس انت حدد جوابك لحتى اعرف جاوب. يعني بالحقوق التالية ما في مساواة.
ما كان قصدي قلل من احترامك عكل حال وازا فهمت انت هيك فانا اسفة.
بالعكس طوني انا بستمتع بالحكي معك . انا بستفيد وانت بتستفيد.
2-وهدول شو معناهم ؟
” وإن جنحوا للسلم فاجنح لها وتوكل على الله ”
” فإن اعتزلوكم فلم يقاتلوكم وألقوا إليكم السلم فما جعل الله لكم عليهم سبيلاً ”
” لا ينهاكم الله عن الذين لم يقاتلوكم ولم يخرجوكم من دياركم أن تبروهم وتقسطوا إليهم إن الله يحب المقسطين ”
( يا أيها الناس لا تتمنوا لقاء العدو وسلوا الله العافية)
( تألفوا الناس وتأنوا بهم، ولا تغيروا عليهم حتى تدعوهم، فما على الأرض من أهل بيت من مدر ولا وبر إلا تأتوكي بهم مسلمين أحب من أن تأتوني بأبنائهم ونسائهم وتقتلوا رجالهم )
( فمن اعتدى عليكم فاعتوا عليه بمثل ما اعتدى عليكم ) < لاحظ انو بمثل .
" وأفوا بعهد الله إذا عاهدتم ولا تنقضوا الإيمان بعد توكيدها )
ماشي في قتال بس القتال إلو اسباب ، يعني في بواعث متل رفع الاعتداء عن المسلمين وديارهم وأمولهم، ومتل وجود ناس بمنعوا وصول الدعوة، ومتل وجود جماعات بتعمل على نشر الفتنة. وما في بالدولة الاسلامية اشي اسمو غذر او قتل من دون علم. في فالبداية دعوة للدين، وفي معاهدات وفي قواعد شرعية للقتال سبق وذكرتها بردي الأول.
جيبلي دستور بشري او دين آخر بتسامح مع الاعداء بهالطريقة !!!سواء من ناحية الاسرى ياللي رح احكي عنها بعدين او من ناحية كيفية القتال.
أميركا رمت قنبلة على اليابان عجبت عليها، اليهود عملوا مجازر لشبعوا،
3- هل الاسلام هوي حكي رجال الدين مثلاً ؟ ما عنا نحنا قرآن وسنة نقرأهم ونفكر فيهم ؟ ولا لازم ناخد بس شو بقول رجال الدين ؟
من يجيز زواج بنت التسعة ما بعتقد انو الو دخل بالاسلام. يعني منطقياً وعقلياً واخلاقياً الأمر غير مقبول. بس ما جاوبت لمن قلتلك انو بأميركا نسبة انجاب البنات تحت السن القانوني أكبر من البلاد العربية بكتير ؟
بعتقد في فرق كتير كبير بين الناس اللي عاملة حالها رجل دين هالايام وبين علماء الدين قديماً.
4- بداية متى بدأ القتال ؟ الرسول كان يدعو لمدة 13 سنة بمكة ولا مسك سيف بهداك الوقت ؟ والدعوة بالمدينة كانت 10 سنوات. يعني 13 اكتر 10 سنين !وبعدين ليش ما بلش يقتل بالناس طيب من هداك الوقت ؟ هل الاسلام دين سيف فعلاً؟ مش قادرة اتخيل ، منطقياً هذا غير صائب لانو ببلاد كتير الاسلام انتشر نتيجة لأشياء كثيرة لا دخل لها بالحروب. الرسول بالمدينة قديش آذوه اليهود بهداك الوقت ؟ حتى في قصة لمن راحوا بدهم يقاتلوا وسمعوا الاذان هناك رجعوا لأنو عرفوا انو في جوا ناس مسلمين ، حروب الرسول عليه الصلاة والسلام كانت لعد ة أسباب، اما لمواجهة عدوان، او رد اعتداء او القضاءعلى الخطر قبل تفاقمه.بتقدر تقرأ العلاقات الدولة في الاسلام للزحيلي.
قرأت كتاب سيرة من شي سنة. بتذكر بغزوة بدر وقت اخدوا اسرى خلوهن يعلموا المسلمين. بعدين انت عم بتقول عن قتل الاسرى والنساء . عندك دليل ؟ انا بتذكر هاي الاية : ويطعمون الطعام على حبه مسكيناً ويتيماً وأسيراً " فلا يجوز للجندي انو يقتل الاسير ولا انو يتم التفريق بين الام وولدها او الاخ واختو او الاخ واخوه . ولازم يطعموهم ويعتنوا فيهم صحياً. ما بعرف هلا ازا بتعرف شو بصير بمعتقلات اليهود وشو بيعملوا بالفلسطينية او شو بيعملوا حتى العرب بالمساجين عندهم اللي هما اصلا مسلمين بس بطقوا الدين بشغلات وشغلات.بنفس الوقت لا يجوز إيذاء الاسير نفسياً. بتقدر بهالنقطة ازا حابب تتعمق تقرأ تفسير ابن كثير الجزء الرابع .او منتخب كنز العمال من مسند احمد الجزء الثاني.
ما في رحمة وتسامح بهالشي ؟ جاوبني ؟
5- طب ازا الشخص دخل بدين عن قناعة ليش يفوتوا ؟
6- ليش بقلك؟
7- تعدد الزوجات اجا لأسباب كتيرة. اول شي التعدد مش على كيف الواحد. التعدد بصير وقت تمرض زوجة الشخص او يصير فيها شي وما تقدر تلبي رغبات الزوج. وقتها بدل ما يطلقها بيتزوج غيرها بدل ما يوقع بالحرام. او في حال كانت الزوجة عقيم والرجل بدو ولاد بدل ما يطلقها بيتزوجج عليها. او وقت يصير بينهم مشاكل والتنين يكرهوا بعض ونفرض البنت ما الها حدا بدل ما يطلقوا بيتزوج. او بسبب زيادة نسبة النساء على الرجال وفي كتير بنات بكون نفسهم يتزوجوا. بتقدر تلاحظ كمان انو بأوروبا لانو الزواج بأكتر من وحدة غير مسموح الزنا منتشر. وما بعرف لو قرأت روسيا بشو فكرت، روسيا من فترة من شي كم شهر قالت انو بفكروا يخلوا التعدد مسموح عندهم.
بالنسبة للمثيرات. مش دايماً النُص بتاخد. فيك تقرأ هاي الاية ( وإن كان رجل يورث كلالة أو امرأة وله اخ أو اخت فلكل واحد منهما السدس ) . هي هون بتاخد السدس متلها متل اخوها؟ فكيف صار بس النص ؟
الحجاب اجا لحتى ما تكون المرأة مجرد متعة. يعنيما بعرف شو الحلو بأنو المراة تنزل على البحر مشلحة .
عمر التسع سنوات سبق وجاوبت عليه اكتر من مرة.
الزواج صفقة تجارية؟ هلا الناس اللي بتعمل هيك. العادات والتقاليد مش الدين. هنالك مهر ومن حق المرأة تاخدوا وهو عبارة عن هدية ( حط الف خط تحت هدية ) من الرجل للمرأة. بس الناس صارت توازن كترة المهر بقيمة المرأة وصارت البنت كأنها سيارة بتنباع.
رجل دين؟ انا بعرف انو المرأة ما بحقلها تتولى رئاسة بس.
8- الدين مش بس رجال الدين. كتير ناس بسموا حالهم هلا رجال دين لأسباب معينة وبس بكون همهم يكفروا الناس وياخدوا مصاري.
9- ذوات الارواح هوي الحرام.
10 – هيدي مزحة. واسفة ما كنت بعرف انك ما بتلقى مزح طوني 🙂
انا ما قلت المرأة تغني لجمهور من الرجال. كان قصدي الغناء بشكل عام.
11- المرأة لازم تكون محجبة.
12- ايه قلتلك فوق انو لذوات الارواح بس. بس بشكل منطلق ما فينا نحكم انو الرسم حرام او النحت او التصوير حرام.
13- اول اية بالقرآن نزلت : إقرأ. هيدي بتكفي.
الرسول كان يطلب من زيد بن حارثة ويحث عليه انو يتعلم لغات. وهيدا علم برضو. اكتشافات المسلمين كتيرة زمان وهاد نابع من الاسلام.
بالعكس هوي صالح لكل زمان ومكان لأنو الدين الوحيد المرن وقادر على تطويع نفسو مع كل زمن.
14- انت قلت بردك الاولاني " المرأة بكلّ الأديان عندها حقوق أكثر من الحقوق الموجودة بالاسلام واليهودية، " انت اللي قلتلي يعني لهيك استفسرت.
كل سفينة والها ربان. الأسرة متل السفينة لازم يكون الها قائد والرجل قائدها. وطاعة الزوج من الادب يعني. والرجل المفروض يكون حسن المعشر وخلوق وقادر على الانفاق عليها. يعني كل واحد فيهم عليه حقوق وعليه واجبات الأمر لا يقتصر على المرأة لوحدها.
فيك تجيبلي دليل على انو بيقدر يحرمها هيا واطفالها من الورثة ؟
شهادة المرأة نصف شهادة الرجل؟ انت عم تسقط بنفس سقطة الميراث. لأ مش دائماً شهادتها نصف شهادة الرجل. بكون هادا بالمعاملات المالية فقط لأنو المرأة ما عندها علم كافي متل الرجال بهيك مواضيع. لكن شهادتها كاملة بمواضيع تانية .
بالنسبة للطلاق يعني افهم انو انت مع عدم وجود الطلاق ؟ طيب ازا وصلوا الشخصين لمرحلة صار العيش فيها مستحيل مع بعض ؟ ما يتطلقوا ؟
15- مش عم قول حرام. بس قصدي ما في اي شي غلط انو ينذكر الجنس بالقرآن كونوا غريزة وشي طبيعي متلو متل اي شي تاني.
16 – مش عم صنف الناس يا طوني. كل واحد حر بدينو انا ما دخلني بس مش حلوة فكرة : تعالوا شوفوني يا عالم انا صرت بوذي. طب شو نعملك يعني ازا صرت؟ هيدا كان قصدي 🙂 ما عندي مانع فوت واقرأ لأي شخص مغير دينو او شخص لاديني بس يكون منطقي ومش مراهق . وجربت بالمناسبة كتير من أكتر من مكان فوت على مدونة لاديني صديقك وما نفع معي ولا مرة. مدونتو محظورة.
17- يلا 😀 يمكن مرتبطين بس انا بشوف انو التقاليد ازا بتتعارض مع الدين مش رح امشي معاها.
18- العلم قابل للتغير . كانوا يقولوا زمان انو الكوليرا بتنتقل بالهوا. بس بعدين تغير هاد الحكي. فيك تجيبلي دليل اثبات انها غير صحيحة؟ ( تبعت الجنين تكوين قصدي ) دورت ما لقيت شي مغلوط عن تكوين الجنين، يمكن ما عرفت دور.
يا طوني انا ما بزعل من اي حد بيختلف معي. بالعكس انا بحترم وبحب اللي بيختلف معي اكتر من اللي بوافقني بالرأي، لأن نحنا مش ببغاءات عم بنهز راسنا . بس لمن تقلي انو المرأة بتاخد نصف الميرات وفيها اية قرآنية بتوضح انو فيها تاخد السدس بحالات اخرى وانت ما ذكرتها . ولمن تقلي المرأة شهادتها نصف شهادة ارجل رغم انها بحالات معينة برضو وانت ما ذكرتها. ولمن تقلي زواج ال 9 سنين وتقلي رجال الدين مش هيك بيحكوا. انا بدي اعرف مين خول رجال الدين انو يكون الدين بس الهم ؟ هي الدين مرتكز بس عليهم.؟ ونحنا شو دورنا؟ نسمع ونهز راسنا؟ طبعاً انا بحكي عن رجال دين اليوم.
انا دائماً بعتبر حالي جاهلة والناس بتعرف أكتر مني. ما عمري قلت اني بعرف اكتر من الناس.
ولاحظ انو ردك فيو تقليل احترام الي رغم انو في شغلات وقت كتبتها كنت عم امزح فيها من مبدأ الصداقة ومبينة انها مزح بس ما بعرف ليه هيك عصبت يعني.
وانا بعتذر ازا ردودي بمدونتك بتدايقك .
ما بيضايقني ردّك أبداً يا كوفية، بالعكس بنبسط بالنقاش معك، لكن أكيد بيضايقني انك تنطلقي من نقاشك من اني جاهل أو اطلاعي “قاصر” حسب تعبيرك. وانتي من اللحظة اللي كتبتي فيها هالاشي فقدتي انتباهي، يعني أكيد مش رح فكّرها مزحة بعد ما توصفي فهمي انو قاصر.
هلق مش هالأزمة، هوّي الكلام المكتوب بيبيّن حادّ أكتر من لو كنا عم نحكي مباشر.
النقاط اللي حكيتي فيها بالردّ الأخير بعتقد رادد عليها بالردّ اللي سبقه وما فيه ضرورة ارجع كرّر نفس الكلام. كمان من اللحظة اللي دافعتي فيها عن وجوب طاعة المرأة لزوجها تيقّنت انو وصلنا لمكان مسدود.
كمان كلمة ذمّي بحدّ ذاتها هي إهانة، انا ما بتعنيلي اشي كون كل الأديان السماوية شايفها خرافات بخرافات، لكن في حال ما بتعرفي عم خبرك.
مش حجّة انو اضطرّ الرسول يابا يحمل سيف، كان فيه ما يحمل لو رسول سلام، غاندي أفضل منّه عشرات الأضعاف من هالناحية. بوذا أهم منّه ومعظم الانبياء حول العالم أهمّ منه لأن ما لجأوا للسيف لفرض أفكارهم. لولا السيف، ما كان الإسلام دخل مكة ولا كنّا سمعنا فيه ولا كنّا اليوم عم نتناقش بهالمسألة.
مش عم قلّك انو كل مشاكلنا سببها الأديان، ولا انه الدين الإسلامي كلّو على بعضه مش منيح، لكن بدك تكوني قادرة تشوفي الوجهين. يعني مثلاً، كيف دين رحمة وفيه آيات قتال متل ما فيه آيات سلام؟ شو هالتناقض هيدا؟
اذا دين بيقاتل، هيدا مش دين، هيدي أيدولوجية سياسية. وإذا نبي حامل سيف هادا مش نبي، هادا قائد سياسي.
يمكن تلاقيني شوي حادّ بالردّ، وبعتذر اذا ضايقتك، لكن كمان يا كوفيّة ما فينا ما نكون غاضبين لمن يكون الدين سبب لمصايب كتيرة وناس عم تفجّر حالها بالأسواق وقمع وظلم وفتاوى مضحكة ونحنا نازلين فيه تجميل وتبرير بدل معالجة المشكلة ووضع الاصبع على الجرح.
اللي عنجد بيهمّو مصلحة دينو ما بينكر عيوب هالدين، بالعكس بيعترف فيها ليقدر يعالجها، مش بيقعد يدافع عن حدّ الردّة وعن مبدأ الذميّة وعن انو الرجل قوّام على المرأة، هلقد صعبة ينقال حدّ الردّة غلط بزماننا ولازم يكون فيه رأي صريح برفضه؟ هلقد صعبة تقولي انو مبدأ الذميّة مبدأ متخلّف وتمييزي وغير عادل ويجب رفضه بكل وضوح؟ هلقد صعب تقولي انو الإسلام لم ينصف المرأة لأنه ولد بصحراء ذكورية لا مكان للمرأة فيها سوى في الخيمة؟
lol
انا ردي مش حاد. انا بريئة كتير الله يسامحك. يعني يمكن الواحد بس يقرؤوا بفكر انو حاد بس انو عادي .
ايوا لو كنا بنحكي عادي ما كان حد فهم التاني غلط. لهيك بكره شي اسمو ماسنجر :S
انا مش عم قول انو المرأة بس لحالها لازم تطيع زوجها. يعني الزوج عليه حقوق أكتر منها. بس لانك ذكرت هيديك النقطة فرديت عليها.
لا بالعكس طوني مش عم اتدايق بالعكس. بس الناس اللي عم بتفجر حالها، المضحوك عليهم وراحوا وفجروا برج التجارة ( بالمناسبة احضر سلسلة 11 سبتمبر تبعت سري للغاية بتكتشف انو الدين دائماً بتم استغلالو لفرض شغلات معينة ) ، الفتاوي المضحكة هيدي بتصدر من ناس ما عندها علم بالدين وبتتخبى تحت ستار الدين بس منشان تمرق شغلات معينة . يعني وقت حد يقول لازم السواق يرضع من المرأة اللي بياخدها كل يوم ع الشغل او عالمكان الفلاني مش بكون واحد مختل ؟ وقت حد يقول انو ميكي ماوس حرام ؟ وقت واحد يقول الرياضة العنيفة حرام ؟ قيادة السيارة حرام ؟ عدم تغطية الوجه حرام ؟ ومرة سمعت واحد بالراديو بقول انو المرأة تلبس بنطلون كمان حرام حتى لو فوقو تنورة ، قال شو ، قال تشبه بالاجانب 😀
مرة كنت عم بحكي مع بنت سعودية عن النقاب ، هيي متنقبة ولأنها بالسعودية مفروض عليها فرض يعني، وطلعت كل البنات اللي ما بغطوا وجهم من الدين رغم اني متأكدة انو جواها هي رافضتو.
لمن تشوف بلد متل السعودية ويكون فيها الحجاب مفروض فرض وبتلاقي بنات الطبقة العليا اللي هي المفروض انها فارضة هاد القانون بس يطلعوا ع اميركا بكونوا لابسين لبس متل اللي بيلسبوا الامريكان بختل توازن الدين عند الواحد ؟ اي دين بنادي انو الطبقة العليا حرة والعامة مفروض عليها الحجاب فرض ؟ هني حرين يلبسوا شو ما بدهم بس لا عاد يفرضوا اشيا على الناس.هاي الاشياء كلها خلت الناس تنظر للدين بطريقة غلط.
بالنسبة لقتل المرتد حالياً أكيد مش رح يتم تطبيقو. بتم تطبيقو لمن يكون في دولة اسلامية بس . وبالنسبة لمبدأ الذمي، حكيت قبل كتير عنو وما شايفة غلط فيو عليه حقوق وعليه واجبات متلو متل اي شخص تاني بالدولة. وبالنسبة للمرأة كمان ما شايفة فيه اي غلط بحقوقها. الغلط بتعامل الناس هالأيام بس . الواحد بحب يحبس مرتو بالبيت ، بشوف انو صوتها عيب، وبشوف انو اسمها عيب وانو وجها عيب وبصير يقول هيك الدين وهوي الدين مش هيك. انا دارية. بضل هيدا بالنهاية هاد رأيي .
سألتك عن اشيا فوق ذكرتها انو تعطيني دليل عليها ما جبتلي :O
كوفيه
قلتي شيء كارثي وخطير ضمن الكلام
قلتي ان العقوبات الدينية المزعومة رادع للناس كي لا ينتشر الفوضى
لو اتكلمنا عن السرقة مثلا فهنا فمصر اكتر اوقات السنة سرقات قبل عيد الفطر والاضحى يعني في رمضان وكذلك اكتر حالات التحرش الجنسي من السنة بعد الافطار وفي الاعياد والمواصلات العامة وللمحجبات اكثر من غيرهن لدرجة اني لا اخرج من بيتي طول الاعياد ولو حدث فاتحرك بالسيارة ويجب ان اطلب من اخي التواجد معي حتى باب السيارة مع العلم اني اسكن باحدى الاحياء الراقية
((على الهامش :
حكت لي صديقة محجبة ان اهم ادوات حمايتها دبوس الطرحة واكتشفت انه شيء شائع بين المحجبات فلان التحرش بالنساء في الاتوبيسات والمواصلات العامة روتين يومي معهن فدبوس الطرحة هو سلاحهم الوحيد والصامت يشكون به اصابع الرجال التي تتحسسهم :: فعلا هنا الحجاب حامي و الاسلام رادع ))
وهكذا كان يحدث في المدينة ايام النبي لذا امر الحرائر بالحجاب لكي لا ينقض عليهم شباب المسلمين المتسكعين .. مش عشان الحجاب حامي او رداء عفة فحيبصولها ويقعوا على الارض من الهدى المفاجيء لا عشان يعرفوا ان وراها رجل وقبيلة ياخدوا بتارها فيخافوا يقربولها .. الحقيقة ونعم
يعني الاسلام حل الموضوع بانها تبين ان ليها رجال فخوفا منهم يبعدوا مش خوف من نبي ولا اله
يعني لو واحدة عزباء مثلا وليس لها رجال او عزوة حتبقى ملطشة اللي رايح واللي جاي يتحرش بيها
القانون والحقوق المدنية والانسانية هي الامان في المجتمع وليس خوف وهمي من عقاب ما سيحدث بعد موتي .. مافي مرة شفت لقاء مع مجرم قد ردعه عقاب اخروي عن فعله لكن مايردعه هو القانون الذي وضعه بشر ونفذه بشر
اهلا هبة
مصر بداية ليست دولة إسلامية . لذلك لا تستطيعين أن تقومي بفرض قانون معين أو إخراج فرضية معينة عن المصريين. بمعنى : هل سيتهم أي مصري أن اليوم هو العيد كي لا يقوم بالسرقة ؟ هل العيد يعني له شيئاً إن لم يكن مسلماً؟ هل المسلمون لا يسرقون؟ هنالك العديد من الأشخاص تحمل هويتهم اسم مسلم وهم لا يمتون له بأية صلة.
اذاً لا شأن لرمضان ولا العيد بالسرقة او بالتحرش الجنسي. المشكلة في الدولة نفسها. وإن كانت نسبة التحرش في مصر كبيرة فهذا لا يقع على الاسلام. هذا يقع على الشرطة وأسباب اجتماعية أخرى.
بالنسبة للهامش فأنا أيضاً لا أملك أي معلومات عن التحرش في مصر رغم إيقاني الشديد بكثر السرقة وارتفاع نسبة الجريمة والتحرش في مصر ( لا أملك معلومات ولكن من الأخبار المتفرقة اليومية في الصحف ) ، ونعود هنا لأمر لماهية الحجاب الذي تلبسه صديقتك، هل هو يتمثل في خرقة على الرأس؟ أم في لباس فضفاض وساتر ولا يصف ولا يشف إضافة إلى الأخلاق ؟
وبهذه المناسبة أنا أعرف بنت منقبة، تقوم بوضع طن مكياج على عيونها وعدسات كبيرة جداً ويلاحقها الشباب طبعاً هي مبسوطة على الوضع فهل نلوم الحجاب هناك؟ هل نلوم الإسلام؟
وأعرف فتيات كثر متحجبات وجميلات جداً ولا يقترب منهن أحد . وإن حدث واقترب ليس هنالك من وسيلة سوى التطنيش . ولا أعرف إن وجدت خدمات معينة عندكم في الشرطة لمثل هذه الحالات.
عموماً أنا لاأملك أي معلومات عن مصر لذلك لا أستطيع أن أفتي.
هل حقاً هذا ما كان يحدث في المدينة ؟ هل بإمكانك إرفاق دليل مع مصدره لو سمحتِ ؟ لأن الطعن في الأشخاص أمر غير مقبول. هل كان على زمنهم دبابيس ؟ من أي مصنع ؟
شيء آخر، بإمكانك الاطلاق على شباب اليوم من المسلمين متسكعين لان الاسلام صار مجرد كلمة في الجواز لكن على شباب ذلك الزمان؟ أظن بأنه صعب. لا يقتصر الأمر على المسلمين حتى المسيحين وحتى اليهود ، لأن الأشخاص الذين كانوا في بداية أي دين او عقيدة و لم يدخلوها عنوة ولا بالوراثة دخلوها عن قناعة تامة.
وهل لديكِ إحصائية عن أن القانون الوضعي ناجح؟ لو كان القانون الوضعي ناجح لقلة نسب الجريمة في العالم كله.
وأمر آخر، هل بظنك من يقوم بارتكاب جريمة هو مؤمن ؟ إن لم يردعه دينه عن الجريمة أياً كان فهو ليس مؤمناً.
في ظل غياب أي تفسير موحد للقرأن الكريم لا نملك الحق في الفصل بين النص والتفسير الخاطىء, فبأي حق نعتبر أن من أفتى بقتل ميكي ماوس لا يمثل النص … ان هذة التفسيرات المتناقضة لهذا النص الالهي هي دليل عقم النص عن تقديم تعاليم واضحة.
وهنا نستذكر كلام نسيم طالب في كتابه الشهير “البجعة السوداء” اذ يعتبر في سياق حديثه عن الأدوات الاقتصادية أنه اذا انطلقنا من حقيقة واحدة لنصل الى استنتاجين متناقضين الأجدر بنا أن نصمت لأننا لا نعلم شيء. والمماثلة واضحة هنا على الصعيد الديني اذ أنه اذا انطلقنا من حقيقة وجود الله (فلنسلم جدلا) نصل عندها الا عشرات الأديان كلها تناقض الأخر, واذا سلمنا بحقيقة الاسلام أيضا” نصل الى استنتاجات المذاهب اللتي تحارب بعضها الأخر, وان سلمنا جدلا بحقيقة القرأن نصل أيضا الاستنتجات متناقضة كما أوضح صديقنا أدون.
اذا” بدل أن نتنافس على التبشير الديني الأجدر بنا أن نصمت بالرغم من اعتقادي بالحاجة الاجتماعية والروحية للأديان كايمان شخصي لا كشريعة تحكن المجتمعز
يااستاذة مصر 94% منها مسلمين ده غير ان جماعات التكفير والهجرة والمتأسلمين بتشكل 70% او اكتر من المسلمين المصريين
والدليل مقاعد مجلس الشعب الدورة السابقة اللي ذهب كلها ليهم بنسة 65% يمين اسلامي
وبعدين انت من خمس دقايق نظمتى شعر عن اكتمال ورحمة القرآن ودلوقتي بترجعي الغلط للبشر مش النص طيب ما لو التطبيق غلط يبقى النص ناقص يا استاذة وياريت تراجعي رد الزميل Andalus
السابق لكلامك عشان مانكررش ونعيد الكلام
موضوع تحرشات المدينة وانزال الحجاب بسبب ده بالاغلب انا طبعا مش مهتمة احط مصدر لاني مش هدفي اقنع حد باللي انا شايفاه ومش مهتمة بالاقناع ولا بكتب مقالة عشان اوثق المعلومة دي قريتها كتير جدا لاني في البحث ده بقالي سنين مابتفطمش على افكار مش فاهماهه ولا مقتنعة بيها بس عامة انا لمحت المصادر قريب في مقال للصديق لاديني http://ladenee.blogspot.com/
ياريت ترجعي ليها حيفيدك كتير خصوصا انه مركز على الاسلام في مقالاته ومعلوماته التاريخية موثوقة وموثقة
عفوا يا كوفية بس انت بتعيدي وتناقضي الكلام تاني
يا استاذة المتأسلمين دايما رافعين شعار “الاسلام هو الحل” طيب ما لو هو الحل ليه مانضمش ليه المسلمين بالوراثة دول واتنقلوا لخانة الاقتناع ولو هو الحل ليه الدول الاسلامية “زي مصر” في مزبلة الامم رغم انها ايام الفراعنة “الكفرة” كانت فوق الكل
بلاش ليه امريكا هزمت افغانستان والعراق مثلا مع انهم مسلمين ليه دينهم مانجدهم رغم ان افغانيستان كانت بتطبق الشريعة خصوصا في الحجاب بحذافيرها لدرجة ان مهامهم كلها كانت بتنحصر في شيل الحجاب ووضع الزي الرسمي و……..
عندي احصائيات لقانون وضعي اسألي نفسك السؤال صح : عندك احصائيات لقانون اسلامي تقول ان الامة المسلمة المطبقة معدومة الجريمة
اقلك انا بقى مثالين : سويسرا نسبة الجريمة فيها شبه معدومة رغم انه قانون وضعي وكتير من بلدان اوروبا وليس العواصم وكتير من ولايات امريكا وليس عواصم الولايات وكلهم عندهم احصائيات بارقام مش نظام المسكوت عنه في مجتمعات العرب
وعندنا السعودية : اخر خدمة فتحوها لخط الشكوى من الاغتصاب الاسري وخصوصا للاطفال
وفي موضوع على موقع اللادينيين العرب من سنة موجود احصائية من طرف السعودية عن حالات الحمل من المحارم اللي بتقدر بالآلاف ده غير جرائم القتل اللي بتنتهي على دية مالية وما الى ذلك
بصي ياكوفية عايزة تسودي ناس امحي تفكيرهم خليهم اصنام لوقربوا ناحية اي مصلحة ليكي تقولي حاسب ده حرام قيموا الحد .. الاسلام الدين الوحيد اللي شرع للمسلمين الذين يأسرون ان يتخذوهم كالجواري والعبيد ويفعلوا بهم مايشاءوا .. وهو الدين الوحيد اللي اقام حد القتل على الذين يتركونه.. فعلا ديموقراطية رحمة
على الهامش:
نصر حامد ابو زيد استاذ جامعة مصري اتهموه بالردة وبالتفريق بينه وبين زوجته ده غير رسائل التهديد بالقتل مما اضره للهرب خارج مصر
سيد القمني قد سجن بالسعودية
فرج فوده قتل
…………….
ده ارهاب على مفكريين ده غير الناس العادية
ياريت لو عايزة تعرفي الاسلام اكتر ما تجتريش المسموح من المعرفة اللي كل الناس حافظينه وبيكرروه وسكوت على كده ياريت تدخلي موقع الملحدين العرب
el7ad.org
وتراجعي المكتوب عن نقد الدين الاسلامي وياريت تراجعي العديد من الكتب افتكر منهم
مصادر التاريخ الاسلامي – اسماعيل الادهم
لماذا انا ملحد – اسماعيل الادهم
وهم الاله – تشارلز دوكينز
—————————————————————————-
ملحوظة : اضفت الرد في العام لما سبق من التكرار في ردود الزملاء على الافكار المطروحة ولكي يتابعه المتابعون فلا يعيدوا الكلام نظرا لان الحديث غير خاص
أهلاً هابي.
بداية قبل ردي السابق أنا رجعت لإحصائيات المخابرات الامريكية. ونسبة المسلمين في مصر هي 90% حسب احصائية 2010. لكن انا ردي مش من هون نابع. لمن عم قول دولة اسلامية مش بكون قصدي انو الدولة فيها نسبة مسلمين كبيرة. دولة اسلامية يعني بتخضع لأحكام اسلامية. يعني السارق عقوبتو قطع اليد مش السجن( حتى لا تفتحي موضوع السرقة فمش كل سرقة يتم فيها القطع، للسارق شروط والخوض فيها طويل فيكي على هالاساس تراجعي مواقع اسلامية كتير )، وما فيها بارات وهالقصص وما بكون فيها ابن الواصل بحقلو يقتل وينهب والفقير ما بحقلو يعمل شي وازا عمل بيتعاقب لانو يا حرام فقير. هيدا قصدي مش أكتر. ما حكمت عنسبة المسلمين فيها .
لمن قول تطبيق هيدا بيرجع لأنو الشخص ماخد الدين بطريقة غلط. يعني متل واحد مسلم بس بيشرب خمرة. او واحد مسلم وما بصلي بس بيجي بيقلك التعدد حلال وهاد حقي وبيتزوج وبيرمي مرتو الأولى.
عزيزتي يمكن لو قرأتي ردودي السابقة بتعرفي انو مدونة لاديني مش عم تفتح عندي . وما بحياتي شفت المادة المعروضة فيها. بس بظن انو ردودي مش عم تنقرأ لهيك بتاخدي جزئية وبتتركي باقي الجزئيات.
ابن تيمية قال بما معناه يرفع الله الدولة الكافرة العادلة ويذل الله الدولة المسلمة الظالمة. وبعتقد هاد كافي وبيشرح كل قصدي.
ازا انتي بتفكري انو السعودية بتطبق الدين فانتي عم تضحكي على حالك. الدين لا يعني الكبت. الدين هو اليسر وليس العسر. الدين مش معناه البنت تتخمر داخل البلد وخارج حدود البلد تلبس بكيني. وبعتقد فيكي تراجعي تاريخ الخلفاء وتعرفي كيف كانت نسب السرقة او باقي الجرائم بهداك الوقت. بعدين يا عزيزتي مش عم قول انو القوانين الوضعية غلط، انتي بكلامك هاد عم بتقوليني شي ما قلتو، الناس مش روبوتات، شي طبيعي يكون فيه قوانين وضيعة بكتير أمور وهالنسب شي طبيعي تكون ببلاد متل كندا والنرويج نسبة الجريمة عندن قليلة حسب ما بذكر بس ليه منها قليلة بأميركا كمان؟ او منها قليلة ببريطانيا 😉 .. هيدا ان دل على شيء دل على انو الدول الاخرى كافية سكانها بامور معينة بتخلي الواحد فيها ما يسرق او يقتل يعني عندها قوانين متينة وهالقوانين كونها قوانين بشرية مع الزمن رح تتغيرحسب متطلبات البيئة والجيل القادم، لكن كل قصدي انو القانون الالهي هو عبارة عن قانون ثابت. طبعاً الله مش عم يمنع حد يحط قوانين وضعية 🙂 لكن مش بأمور ثابتة .
من عند جملة : بصي يا كوفية … الخ ما فهمتها صراحة. لو كتبتيها بالفصحى او بلهجة أقرب.
سبق وقلت فيكي تجيبيلي دليل على انو هيك بصير بالأسر ؟ بس ما حد جابلي دليل هذا ان دل على شي دل على انو بس مجرد كلام.
الأسير لا يعامل كالعبد. وما عمري قرأت آية قرآنية او حديث شريف بقولوا خلوا الاسير عبد، إن كان عندك دليل من القرآن او السنة يا ريت تجيبي ، الموضوع عكل حال بطل يتحمل يعني كاريكاتير صغير 😀
بعتقد هاد آخر رد إلي على كلامك لأنو رح نضل ندور بنفس الفُلك. حكيت لشبعت :$ . سلامي عزيزتي
أندلس العزيز، مشتاقين صديقي،
ما بقدر ضيف كتير على اللي حكيته لأن موافقك مية بالمية.
كارولينا، معك حقّ، للأسف الدينيين بيعتقدوا ان المنافسة هي حصراً بين الأديان السماوية، كأن اذا قلنا عن خلل في دين معيّن يعني عم نمدح بدين آخر، وهيي هالأديان كلها نابعة من نفس الفلسفة الأساسية، فلسفة التوحيد الديكتاتوري ومنهج التسليم بالمنزل وتصنيف الناس لمراتب وتوزيعها على النار والسماوات.
هبة، كأن كنتي عم تحكي بلساني صديقتي، وكلامك هو عن تجربة مباشرة وضعتيها تحت مجهر عقلك ومعرفتك الواسعة، وكمان ما بقدر اضيف على كلامك غير اني قول عن أسلوبك انه سيف جراحي : )
كوفية العزيزة،
أولاً حابب اعتذر منّك في حال كنت حادّ تجاهك ببعض الأجوبة السابقة والنقاش كان ممتع ومغني ولو مختلفين على المسائل بالمجمل.
بس يا صديقتي برجع بقللك، برأيي مش لازم نضلّ نبحث عن تبريرات للدين، يجب وضع الاصبع على الجرح والاعتراف بالمشكلة، حضرتك عم تنسبي كل الشرور للأفراد وللعادات وللتقاليد وتنسبي كلّ الخير للدين، كأن الدين موجود بمعزل عن الأفراد وكأن مش مساهم بترسيخ العادات المتخلّفة اللي حضرتك عم تعارضيها. بعدين، اذا كان الدين مش قادر يحوّل أكثر من 1 % من الأفراد إلى أفراد أخلاقيين وخيّرين، شو النفع منّه؟ ومش بتبطل مقولة أن الأديان هي حافز أخلاقي للناس؟
تبقي بخير بنّوت
أهلاً طوني مرة تانية
لأ بالعكس ردودك عادية ولو
مش عم دور على تبريرات للدين. بس هيدي قناعاتي وهيك انا عم شوف الدين وان كان حد بشوه الدين لا يقع الخطأ على الدين.
بعتقد حكينا باستفاضة وكل شخص وصل فكرتو للتاني وببقى عكل واحد يبحث أكتر وبتمنى انو كل شخص فينا يصل للصواب يوماً ما.
اصلا ليش فتحت هيك موضوع يعني الاسلام صارلو الف وخمسمية سنة و بشهادة المؤرخين الغير مسلمين كان قمة العدالة, وتفسير الايات بيرجع النا نحنا المسلمين مو الك يعني ممكن فوت انا على شركة مالي فيها شي و قلهون والله النظام الداخلي تبعكون كلو غلط???? انت عملت هيك لما حكيت عن الآيات, انت بيحقلك تدخل لما ندعسلك على طرف وناخد حقوقك, ولا تعذرني حبيبي والاختلاف في الرأي يفسد للود قضية لأنو كان في ود قبل ما تستخدم الفاظ وسخة !! الا لا يجهلن أحد علينا ** فنجهل فوق جهل الجاهلينَ
بالنسبة لأول سؤال، “ليش فتحت هيك موضوع”، لأن مدونتي وحر فيها وما خصّك لا انت ولا غيرك شو بدي افتح فيها موضوع.
تاني شغلة، اذا كان قمة العدالة بالنسبة الك، طيب هيدا رأيك ومش ملزم لحدا، وبرأيي، اللي ما بيلزم حدا غيري كمان، الإسلام كان ولا يزال عكس العدالة تماماً بشرائعه الصحراوية، تاريخياً وحالياً ومستقبلياً كمان.
أما بالنسبة لجملة “تفسير الآيات بيرجع النا نحنا المسلمين مو الك”، تعا لقلّك يا عيني، لمن يكون فيه دين بأمه وأبوه عم يأثر على حياتك وعلى مستقبلك وعلى أسلوب عيشك، تفسير الآيات والتعاطي ومواجهة أفكاره مبلى بيرجع الي والك ولكلّ حدا عم يتأثر بمساوئه، وكون الإنسان مش مسلم ما بينفي حقّه بإعطاء رأيه بالإسلام والقرآن، تماماً متل كون الإنسان مسلم ما بينفي حقّه بإعطاء رأيه بالمسيحية والالحاد والوثنية وغيرها.
تالت شغلة، لمن بدك تجي تترك تعليق بمدوّنة حدا بدّك تكون محترم الشخص اللي عم تحكي معه، تعليقك طائفي وخاتمته بتوصفني اني جاهل، انا مش قادر علمك الاحترام وكان فيني امحي التعليق بس رح اتركه لأن بيدلّ تماماً على الأخلاق الدينية الكارثية اللي ابتلينا فيها كشعوب وبيدلّ مين الجاهل الحقيقي بيناتنا.
أما اللي شايفه حضرتك ألفاظ وسخة فهو يا عزيزي ألفاظ عادية جداً، اذا كلمات”متل خرافات” و”إله فاشل” شايفهم كلمات وسخة، هيدي مشكلتك وحدك، وبقترح عليك لمن تشوفها تكبس الـ X بأعلى الصفحة وترتاح منها وما تقرا وتجي تتعبنا بالردّ على تعليقات طائفية متل تعليقك.
بالنسبة الي، الكلمات الوسخة هيي “ذمّي”، “مشرك”، “نكاح”، “ضرب الأعناق”، “نجاسة”، “عورة”، وما شابه من الكلمات اللي بتعرف مصدرها.
مش حجّة انو اضطرّ الرسول يابا يحمل سيف، كان فيه ما يحمل لو رسول سلام، غاندي أفضل منّه عشرات الأضعاف من هالناحية. بوذا أهم منّه ومعظم الانبياء حول العالم أهمّ منه لأن ما لجأوا للسيف لفرض أفكارهم. لولا السيف، ما كان الإسلام دخل مكة ولا كنّا سمعنا فيه ولا كنّا اليوم عم نتناقش بهالمسألة.
…………………………………….
و لنا أن نقرأ ما قاله المهاتما غاندي بنفسه عن ذلك الرسول:
I wanted to know the best of the life of one who holds today an undisputed sway over the hearts of millions of mankind…. I became more than ever convinced that it was not the sword that won a place for Islam in those days in the scheme of life. It was the rigid simplicity, the utter self-effacement of the Prophet the scrupulous regard for pledges, his intense devotion to his friends and followers, his intrepidity, his fearlessness, his absolute trust in God and in his own mission. These and not the sword carried everything before them and surmounted every obstacle. When I closed the second volume (of the Prophet’s biography), I was sorry there was not more for me to read of that great life
أردت أن أعرف صفات الرجل الذي يملك بدون نزاع قلوب ملايين البشر .. لقد أصبحت مقتنعاً كل الاقتناع أن السيف لم يكن الوسيلة التي من خلالها اكتسب الإسلام مكانته، بل كان ذلك من خلال بساطة الرسول مع دقته وصدقه في الوعود، وتفانيه وإخلاصه لأصدقائه وأتباعه، وشجاعته مع ثقته المطلقة في ربه وفي رسالته .. هذه الصفات هي التي مهدت الطريق، وتخطت المصاعب وليس السيف .. بعد انتهائي من قراءة الجزء الثاني من حياة الرسول وجدت نفسي أسفاً لعدم وجود المزيد للتعرف أكثر على حياته العظيمة .
مش متوقّع من رجل سياسي متل المهاتما غاندي اللي فيه ببلده ملايين المسلمين واللي أساس دعوته التحريرية قائمة على المساواة بين مواطنيه إنه يقول الحقيقة عن الرسول، بالإنكليزي فيه اسم لهيك اشيا :
political correctedness، أقرب ترجمة للعربية هي “الملائمة السياسية”.
لو بتخبّرنا انت انه لو بلا السيف شو كان مصير الدين الإسلامي من بداياته لليوم وهل كانت الشعوب وأولهم قريش اعتنقوه بشكل كامل.
So true eh? (Click on the Image for the source)
نينار 
ياااخ .. قولتك شو بدو يطلع بعد هدول كمان ؟
يعدمني انا D:
انشالله ما يطلع، احنا بهدول مش مخلصين :p
و يا هلا بريتا : D
hehehehehehehehehe
الاسلام فيه :
تقطع الايدي والارجل من خلاف
الرجم حتى الموت
الجلد
قطع اليد …………….
ولسة فيه جوايز
———————————
خارج الموضوع :
قريت مقالة جامدة جدا عن تصنيع اول كائن صناعي في المعمل من البكتيريا
لكن بقت خطوة تخليق الحمض النووي من المواد الكيميائية كربون وهيدروجين لو اتحلت دي مش حيتبقى عند الدينيين حجج
شفت فيلم عن قصة حياة داروون اسمه creation
قال فيه ان الرب ماعدش ينفع يزعم انه خلق كل اشكال الحياة دي
ولو انهدم الاساس حتنهدم الطقوس تماما
مفتقداك ياعم طوني بتابع كتاباتك دايما واكيد بحبها كلها
دمت بكل خير
هبة العزيزة، مفتقد تعليقاتك بالفترة الأخيرة
اي لسا فيه جوايز كتير وكل يوم بساعدونا رجال الدين نكتشف جائزة جديدة، يمكن كاريكاتور واحد مش كافي : p
بالنسبة لتصنيع الحياة مخبرياً اه قرأت الخبر ومثير للانتباه جداً. لكن بيبقى ان الأديان الابراهيمية سقطت أخلاقياً قبل ان تسقط علمياً، وهذا الأهم.
سلامي
قولتك بيمشي الحال لو اخترعنا دين جديد
بيكفينا أديان يا صديقي، عنا العلم والطبيعة والحب والحكمة والحرية وأنفسنا، هيدي دين جديد بيكفي وبيوفي..
سلامات صديقي
طارق
يعني بدك تصير تعبد الشجر مثلاً؟
ولا بدك تعبد الهواء ولا المي ؟
:S لول
ما بعرف ليه خطر عبالي سد هارتا، اقرأ الرواية لو ما كنت قارئها
هبة
لم أر ديناً أكثر رحمة من الاسلام عزيزتي. يعني لو تحطي كل الأديان سوا عكفة ميزان والدين الاسلامي لحال رح تشوفي الكفة الراجحة هي للإسلام. ما بعرف يعني بس قريت كتير بالمسيحية واليهودية وبشغلات تانية وكلهم فيهم نقص ومش منطقيين والعقل ما بتقبلهم. بتكفي جملة : اطفئ سراح عقلك واتبعني، الدين اللي بالنسبة الو العلم والعقل عاهة ما بلزمني. وبكفي انو المراة عندهم ما عندها حقوق. لا ألوم اللي من هيك ديانات بس يصيروا لادينيين . هي حالة طبيعية نتيجة وجود اللامنطفية.
والقانون البشري اصلا بعاقب الناس اللي بتغلط بالمجتمع، فهل بدك القانون الإلهي يعني يقول للناس ساووا شو ما بدكن، ما حدا حاسبلكن حساب. لماذا خلقنا في الأساس ؟ إن لم يكن للحياة معنى فهنالك خطأ كبير في وجودنا على هذه الحياة .
الناس البتخاف من العقوبة هي الناس المش واثقة من حالها.
طوني
ما حلو الكاريكاتور. يعني حسيتو اهبل 😀 يعني مش مشغول صح 🙂
بس فيك توضحلي كيف سقطت الاديان علمياً قبل ما تسقط أخلاقياً ؟
ما تجيبلي دليل عن فرضيات تصنيع خلية. بدي معلومات أكيدة يعني اشيا صارت . طبعاً بهمني من كل الموضوع الدين الاسلامي لانو باقي الديانات سقطت زمان .
مسا الخير كوفية،
بتمنى تكون احوالك بخير وكل شي منيح.
اسمحيلي اختلف معك على رأيك بالأديان. بالنسبة الي، لحتى نقول عن دين ما دين رحمة لازم يكون فيه شروط معينة مش متوافرة بالاسلام، وللصراحة بحالة الاسلام العكس تماماً هو الموجود. جوهر فلسفة الإسلام كدين هي اللارحمة – وحقك تخالفيني بالرأي – لأن الإسلام أولاً قائم على تصنيف البشر إلى مراتب بناء على قناعاتها: مؤمن مسلم ذكر له كامل الحقوق، مؤمنة مسلمة أنثى لها نصف حقوق، مؤمن كتابيّ له ربع حقوق، غير مؤمن لا حقوق له، وأخيراً الكفار والمشركين والزنادقة الذين يجب قتلهم.
خلّينا نبلّش من الجدّ، كيف ممكن يكون دين تسامح وانا لأن اسمي طوني بكون فيه ابن ذمّة، وبوطني وبأرضي؟ وكيف بيكون دين تسامح اذا إله هالدين نفسه هوايته حرق الناس في النار بسبب قناعاتها؟ وكيف بيكون دين تسامح اذا رسوله كان قائد عسكري وسيفه ملطّخ بالدماء؟ كيف ممكن يكون دين تسامح وفيه شي اسمه حدّ الردة؟ وكيف ممكن يكون دين تسامح والمرأة فيه ممسحة؟ وكيف ممكن يكون دين تسامح ويجيز زواج البنت لمن تبلغ التسع سنوات؟ ووين التسامح لمن يكون هناك آيات في القرآن عن قتال المشركين والمرتدين واهل الكتاب أكثر من الآيات اللي بتدعي للسلام معهم؟ وكيف بيكون دين تسامح اذا الرسم والنحت تهمة وعقوبة المصوّر والنحّات هي العذاب الأبدي بجهنّم؟ ووين التسامح بدين يعتبر صوت المرأة وشعرها عورة، وبيعتبر الفنّ حرام، وبيعتبر التفكير ممنوع والتسليم ممدوح؟
المرأة بكلّ الأديان عندها حقوق أكثر من الحقوق الموجودة بالاسلام واليهودية، لكن طبعاً هذا مرتبط بنظرتك لحقوق المرأة لأن اذا كنتي بتشوفي انوا المرأة لازم تقعد بالبيت تكنّس وتطبخ وتكون أداة انجاب فقط، فطبعاً الإسلام هو مع هذا النوع من الحقوق.
وكل اللي حكيته هلق موجود بالقرآن مش عم بخترعه من عندي.
وخلّينا كمان نعدّ كمّ مرّة مارقة كلمات متل حرّية وتسامح بالقرآن وكم مرّة مارقة كلمات متل اضرب وجهنّم والكافرين ونكاح، ورجعي خبريني اذا التسامح هو فعلاً جوهر الرسالة الإسلامية أو مجرّد جملة مارقة فيها بالصدفة.
أما بالنسبة لطبيعي يصيروا لادينيين من الأديان غير الإسلامية، فيا صديقتي معظم اللادينيين والملحدين بالعالم العربي، الإسلام هو سبب إلحادهم، وشوفي هالموقع اذا بتحبّي تعرفي عن هيك ناس أكتر:
http://wake-up-arab.blogspot.com/
كمان يا صديقتي، وبتمنى تتقبلي رأيي بمحبة، من ناحيتي نحنا مش بحاجة لآلهة بتوشوش رجال في الصحراء لنعرف شو معنى الحياة، عنّا عقل وعنّا علم وعنّا فلسفة ومنقدر نكتشف بأنفسنا من دون كتب بتخبّرنا انو قطعة قماش هيي الفرق بين العفة والدعارة.
أما أخيراً، تحدثت عن سقوط الاديان السماوية أخلاقياً قبل سقوطها علمياً، الأديان صارت عبء وكذبة كبيرة ومصدر لمعاناة ملايين البشر، مصدر للتمييز ولنشر الأحقاد وتربية الكراهية عند الأطفال من هنّي وصغار، مصدر لكره الذات وكره الآخرين واحتقار المرأة، ومصدر لتبرير تسلّط الأنظمة وهبل رجال الدين، الأديان السماوية اليوم وخاصة الاسلام هي مصدر لأمور كتيرة، 5 % منها على الأكثر هو إيجابي والـ 95 % الباقيين ويلات ومصايب.
أما السقوط العلمي، ففيكي تبلّشي من أسطورة الخلق ونزولاً، مروراً بشقّ القمر وفوائد جناح الذبابة وبول البعير ودوران الشمس حول الأرض والسماء الصلبة والجنّ واعتقاد القرآن أن النجوم مصابيح معلّقة في السماء لإنارة الأرض في الليل واعتقاده ان الجبال هي عواميد لمنع السماء من السقوط على الأرض (واذا حابة فعلاً تبحثي، فيكي تبدأي بهالمعلومات اللي عم بحكيها وتتأكدي منها).
وبالنسبة لتصنيع الخلية ، هيدي مش فرضية يا صديقتي، هيدا خبر موجود اونلاين اذا بحثتي على غوغل بتلاقيه.
وبالمناسبة، اذا باقي الديانات سقطت يعني الاسلام سقط معها، لأن هوّي بيدّعي انها صحيحة وانو هوّي اجا كخاتمة وتكملة لها.
الأديان سقطت من زمان، وباقي الدفن.
تحياتي
طوني بعتذر على ردي بس لازم تتقبلو.
انت متلك متل كتير اشخاص. مفهومها عن الدين الاسلامي قاصر جداً. الدين الاسلامي أبعد ما يكون عن الأمور اللي ذكرتها يا طوني الله يهديك .
1- فيك تشرحي قاعدة الحقوق هاي؟ اول مرة بسمع فيها. المرأة بالاسلام حقوقها متل حقوق الرجل. الذمي في الاسلام نفس الشي. كيف اختلف الامر معك ؟ من وين دليلك فيني اعرف ؟
2- الاسلام ما عمرو نادى بقتل الكفار. الاسلام بيقتل كل معتدي عليه. شي طبيعي ازا اليهود اجوا واغتصبوا ارضي ادافع عنها، من هالمنطلق اي حد بيهجم علي رح دافع عني وعن الارض . وأبو بكر رضي الله عنه أوصى يزيد بن أبي سفيان لمن بعثوا على الشام وقلو : وإني أوصيك بعشر : لا تقتلن امرأة، ولا صبياً، ولا كبيراً هرماً، ولا تقطعن شجرا مثمراً، ولا تخربن عامراً ولا تعقرن شاة ولا بعيرا إلا لمأكله، ولا تحرقن نخلاً ولا تغرقنه ولا تجبن ” . تاني شي في شروط للحرب بالاسلام . 1) تحريم قتل غير المقاتلين، يعني ازا انت هلا بتشوف ناس بتقاتل ناس مدنيين باسم الاسلام فاعلم ان الاسلام بريء منهم. ازا كل واحد اجا وقلك انا مسلم بس و الله بعمل وبعمل فهاد مش صحيح. ازا بدك تعرف الدين عنجد بتقرأ عنو . 2) تحريم التخريب والتدمير لأموال العدو. 3) تحريم اسخدام وسائل الابادة. وطبعاً الحرب ما بتبدا الا ازا الاخر بدأ. هل هذا ينفي سماحة الاسلام ورحمته ؟ ولا بس انت بتمسك جزئية معينة وبتنسى الباقي ؟ أين الموضوع يا طوني ؟
3- إله الدين هو إله الأديان الأخرى ولا انا غلطانة؟هوايته حرق الناس؟ طب سوري ليه الله خلقك؟ ليه انت مخلوق؟ ازا ما في هدف من الخلق ففي مشكلة بوجودنا. كون وجودنا من دون هدف بيعني انو نحنا مخلوقين عبث وعن طريقة غلطة . هلا وئت تكون انت عليك امتحان ورسبت فيه لأنك ما درست بحقلك تروح تسأل ليش المعلم ظالم وليش اعطاك علامة سيئة ؟ انت ما خُيرت انت تدخل المدرسة . اهلك فوتوك اياها لمن كنت صغير. اي شخص يخالف الصواب فهو يعاقب هاد شي طبيعي . مش هواية هاي . بعدين لازم تعرف شغلة مهمة بالدين انو بالنهاية مش كل الناس حتضل بالنار. المسلمين اللي دخلوا النار رح يرجعوا على الجنة وهكذا .. يعني كل شخص بكون الو فترة عقاب معينة. النار مش أبدية . وشي طبيعي انت تتعاقب. بالنسبة للديانات الاخرى ما عندي علم عم بحكي عن كون الفرد مسلم ودخل النار. وبالمناسبة ليس فقط المسلمون من يدخلوا الجنة. مش شرط يعني الواحد يكون مسلم ليدخل الجنة فيه كتير ناس ما وصلها الدين الاسلامي، معقول هاي تروح على النار ؟ في ناس بإفيريقا ما بتعرف انو في الله اصلاً. في ناس عملت انجازات وغيرت مجرى التاريخ وانقذت أمم. في الاسلام الجنة ليست حكراً على المسلمين ، أليس هذا من سماحة الاسلام؟
4- طيب المقاومة بفلسطين هلا بغض النظر عن دينها، هدول خلينا نقول مش سيوفهم ملطخة بالدماء ؟ مش بقاتلوا؟ ليش بقاتلوا؟ لو الرسول بهموا فعلاً القتال كان لمن راح على الطائف اخد معاه سيف وقتل الناس والاطفال اللي رموا عليه حجار. وسبق وذكرتلك فوق شو هي قواعد الحرب بالاسلام . وهنالك بواعث للقتال متل رفع الاعتداء عن المسلمين ، يعني متل لمن اليهود يهاجموا فلسطين هون في حق بالقتال بالاسلام،
5- حروب الردة ليش ؟ حروب الردة لا تأتي عبثاً. اول شي لازم الواحد تتم استتابتو وإن لم يستتاب يتم قتله وهذا يخضع في ظل دولة تابعة لنظام اسلامي مش متل هلا،وفيك تشوف شو صار بالزنادقة ايام الدولة العباسية وكيف انهم ضلوا يعبروا عن رأيهم فترة طويلة وما حد قلهم شي. ليش حروب الردة؟ لانو الدين مش لعبة. حبيت الدين اهلا وسهلا بس حابب كل يوم تكون بدين شكل هاد بدل على انو الشخص بعاني من الانفصام . يعني الدين مش للتجريب او اللعب.
6- الاسلام يا طوني ما بييجي بقلك اطلع من بلدك بدها تصير بلدي ورح تصير انت ذمي فيها. بعتقد هيك حكي فيو يتطبق على الرحلات الاجنبية لأميركا لمن فتحوها قصدي سرقوها.
7- هل المرأة في الاسلام ممسحة ؟ يعني قصدك انا ممسحة ؟ لول انا بنت ومسلمة وعندي كامل حقوقي. لا ابوي ولا اخوي بيتدخلوا فيا. وعندي حرية كاملة، بعمل اللي بدي اياه ما حد بسألني ليش وكتير بخالف أبوي بالرأي عشغلات كتير ويمكن نسبة كبيرة منها دينية او يقال بأنها دينية واانا بشوف العكس وبشوفها غير منطقية بس ما حد بقلي ليش لأنو بالاخر هاد رأيي وانا اللي رح اتحاسب. المرأة بالاسلام بتاخد ميراثها كامل متلها متل الذكر. وبديانات تانية المرأة اصلا تعتبر شيطان ونجاسة في حين ان الاسلام ينظر للمراة على انها الماسة يجب أن تُصان.
8- من أخبرك أنه يسمح يزواج القاصر؟ لماذا لا تقوم بقراءة الدين أكثر مادمت مهتماً بالمعرفة عنه ؟بنات زمان مو متل بنات اليوم. الشافعي كان يفتي وهو عمره 15 سنة. هلا فيك تقلي انو ابن 15 سنة فيو يحكي كلمتين راكزات ؟ وعائشة رضي الله عنها لمن اتزوجت ع التاسعة كانت قد بلغت. فيك تقلي اني اللي بتبلغ هالايام على عمر ال 9 سنين ؟ عدا عن انو بهداك الوقت البنت غير. والاسلام دين متطور وليس ثابت متل اديان أخرى. يعني هالايام شي طبيعي ومنطقي البنت لا تتزوج على التاسعة ولا حتى على الخامسة عشر وازا في عيل بتعمل هيك فهي اللي بتاخد الاثم لانو هاد حرام . وعلى سيرة زواج القاصر بطلب منك تراجع احصائيات وتشوف نسبة انجاب البنات اللي تحت السن القانوني بأميركا وبالبلاد العربية. انا شفت بعيني الاحصائية. وبأميركا كانت أكتر بكتير. ولا ليكون بحق للبنت تحمل تحت السن القانوني وما بحقلها تتزوج وانا مش عارفة ؟
9- الرسم والنحت والتصوير مش حرام. فيه مقال كتبو الشيخ القرضاوي فيك تقراه.الحرام بكون في شغلات بسيطة فيهم وعفكرة الموسيقا مش حرام كمان. الامور الشائكة في الاسلام كتيرة وهذا من سماحة الاسلام ويسره وسهولته كمان. الموسيقا عليها خلاف كبير وحتى الغناء. وانا بتبع الرأي اللي بقول انهم حلال مادام لا يوجد كلام فاحش. الحلو بالاسلام انو واسع وغير محدد. ما بقلك امشي 1 2 3 ، بقلك هي الأرقام رتبها كيف ما بدك : )
10- مين قال انو صوت المرأة عورة؟ طوني نفسي اجي وافركلك دانك : ) . مين قلك هاد الحكي فهمني ؟ صوت المرأة مش عورة. لو صوت المرأة عورة ما كان بنحكي مع الدكاترة بالجامعة، ما كان بنتصل تلفونات، ما كان بنحكي مع قرايبنا، ما كان ما كان … صوت المرأة مش عورة. بصير صوت المرأة عورة عند الخضوع في القول يعني متل تقعد تتنغج للشب وهوي ما بمتلها بصلة. الآية القرانية ذكرت الخضوع في القول بس لهيك ازا حد قلك هالحكي فهوي فاهم الدين بالشقلوب وعم يمشي على عادات وتقاليد تالفة.وعفكرة في ناس كتير عندها اسمالمرأة حرام وعيب وهي مسلمة رغم اننا كلنا بنعرف اسماء زوجات الرسول. شوف التناقض واللامنطقية بين الدين والتقاليد !
11- شعر المرأة عورة؟ كيف يعني ؟ المرأة المسلمة لازم تكون محجبة.
12- الفن مش حرام، سبق وكتبت رد سابق وفيك تشوف فتوى ومقال الشيخ القرضاوي. الفن بصير حرام لمن يصير خلاعي وساقط. وبعتقد اخلاقياً هيك فن مش مقبول.
13- الاسلام هو الدين الوحيد اللي نادى بالفكر وبالعلم. بالمسيحية شو بقولوا؟ مش بقولوا اطفئ سراج عقلك واتبعني؟ ولا انا غلطانة ؟ بدك عدلك كم كلمة العقل موجودة بالقرآن ؟ بدك عدلك كم كلمة الفكر موجودة بالقرآن ؟ كم كلمة أولي النهى أو الألباب موجودة بالقرآن ؟ كم من عالم مسلم كان بالزمنات؟ كيف كانت الحضارة الاسلامية زمان ؟ شو سر هالنهضة ؟ مش الاسلام ؟ عمرك قرآت القرآن يا طوني ؟ أو عمرك قرأت عن تاريخ علماء المسلمين ؟ بدي اطلب منك طلب. عد كم موجودة كلمة الفكر بالقرآن وكلمة الفكر بالتوراة او الانجيل. رح تنصدم بهيك عدد . طبعاً برجع وبقول انو الدين الاسلامي دين متطور، يعني ممكن شغلات مشيت زمان ما تمشي هلا او تمشي بطريقة أخرى. وفي آيات قرآنية بالمناسبة نزلت بفترة معينة لسبب معين وبعد فترة اجت ايات تناقضها او تغير الحكم فيها او توقفوا،يعني هيك موضوع بحاجة لقراءة متمعنة للقرآن الكريم وحلو تجيب كتاب تفسير فيك تجيب تفسير ابن كثير. يعني مثلاً لو فكرنا بعقلنا ، في حديث واضح وصريح عن تحريم الشرب بأواني الخمر. ماشي ؟ التحريم كان في ذلك الوقت لانو كانوا يشربوا الخمر زمان، وكانوا جديد داخلين بالدين فخوفاً من رجوعهم لشرب الخمر قبل ذاك الحديث. لكن لو حبيت انا اشتري هلا اواني خمر، وين المشكلة بالموضوع؟ ما في أدنى مشكلة . الواحد بفكر بعقلو يعني . لانو وقتي بختلف عن زمان ولأني ما شربت خمر بحياتي وما بعرفو.
14- طيب ما دامك عم بتقول المرأة حقوقها بالاسلام اقل شي فيك تجيبلي دليل ؟ مين قال انو المرأة لازم تقعد بالبيت ؟ المرأة فيها تكون عالمة وتشتغل وتعمل اللي بدها اياه. مصاريها وهي حرة فيهم، بغير ديانات مصاريها ما بتقدر تتصرف فيهم. بغير مجتمعات يُنظر للمرأة على انها نجسة او شيطان او أداة للمتعة بس. لكن هاد مش بالاسلام. الرسول كان ياخد رأي نساؤوا بكتير شغلات بس ازا هلا الرجال قامعين النساء فهاد ما بيعني انو الدين حكى هيك. المشكلة بالتطبيق مش بالدين. بتمنى تجيبلي ادلة فيها المرأة اللي من ديانة تانية حقوقها كاملة عشان دغري اغير ديني ازا هيك . بتمنى تكون نصوص دينية مدام الادلة من الديانات.
15- طيب فيك تجيبلي كم مرة مرقت كلمات متل فكر وعلم وحرية وتسامح وكم مرة انذكرت كلمة نكاح او اضراب؟ انا ما عديتهم لحتى اعرف حابة اعرف عنجد. ما بتذكر انو نكاح مذكورة بهالزخم يعني. بعدين سوري يعني هو الجنس عيب لحتى ما ينذكر بنص قرآني ؟ الجنس غريزة طبيعية. ما بعرف لو قرأت 1984، بس انت بكلامك هاد متل كأنو بتقول انو الجنس حرام او خلص مرة بالسنة وبكفي متل ما كان يعمل الحزب بال رواية.
16- شفت الموقع زمان بس ما عجبني. كل اللي فتحت على بلوجاتهم ناس بس حابة تعمل هالة حولينها وتقول هيني تعالوا اتفرجوا علي انا ما بآمن بالدين الفلاني. بدكن تكتبوا عني بالجريدة متل مدعي الالوهية؟، في ناس عندها مرض نفسي بيجي بمرحلة من المراحل بتصير تقول انا صرت لاديني او صرت بوذي او ما بعرف شووهو بكون بس هيك عم يتهبل، شوف صفحة البوذي اللي بقول انو خليجي. يعني بادي الحكي ببداية متخلفة ، انو بقول : معقول حد يصدق انو خليجي واماراتي بوذي. شو هالهبل؟ شو اعملك يعني ازا انت اول خليجي على رأيك بصير هيك؟ نساوي حفلة رقص يعني؟ اللي بدو يثبت انو هوي فعلاً صار لاديني نتيجة شي معين ما ببدا هيك بداية تافهة !
17- ما بعرف مين قال انو العفة هي بغشاء او بقطعة قماش. المشكلة بتصير لمن العادات والتقاليد تختلط مع الدين بطريقة غلط. في كتير بنات بينولدوا من دون غشان وبيفقدوا غشاءهم نتيجة رياضات عنيفة، هلا هدول صاروا مش عفيفين؟ برأي التقاليد بتكون عاملتلها شي عملة برأي الدين البنت عفيفة.
18- يعني انت بتصدق انو انت كنت قرد زمان ؟ سوري يعني بس مش قادرة استوعب انا، مش آدم هوي اول انسان اجا عوجه الارض؟ صحيح يمكن شكلو بيختلف بس ما كان حيوان ! كان انسان يا طوني . شق القمر صحيح وين الغلط فيو؟ عالم الجن موجود وانا بعتبروا مرات عالم موازي النا بس ما النا دخل فيو. هيدا رأيي يعني، وبعدين الاية اللي بتقول ” وبينهما برزج لا يبغيان ” عن البحر والنهر انهم ما بيختلطوا، هيدي وين مكانها من الاعراب؟ مش دليل قوي على انو القرآن كتاب منزل؟ والايات اللي بتحكي عن كيفية تكوين الجنين، هيدي مش دليل؟
قرأت عن الخلية زمان بس بعتقد الموضوع لا يزال غامض على الأقل بالنسبة لدي. والاسلام صحيح اجا مكمل لباقي الديانات بس اجا مكمل للديانات الصحيحة، مش الديانات المحرفة.
بعتقد يا طوني وما تزعل مني انو لازم تقرأ اكتر عن الدين الاسلامي ليصير عندك نظرة شاملة عنو.
_
لو انت فعلاً شايف انو الدنيا من دون آلهة افضل فهاد الشي بيرجعلك. يعني ازا انت مرتاح بالعكس رح كون مبسوطة الك. بس ما بحقلك تطعن بدين من الأديان بطريقة خاطئة. الدين الاسلامي ما بينفهم من مجرد قراءة كلمة من هون او كلمة من هناك. هاد الشي بيعملوه المستشرقين مو انت يا طوني وما بحقلك الا انك تكون موضوعي بهيك شي. وتقرأ عن موضوع معين بشكل كامل.
و الله يعينك ع قراءة ردي الطويل 🙂
نسيت قول : مساء النور طوني
مسا النور كوفية،
أكيد بتقبّل ردّك وما الي خصّة شو رأيك الشخصي، لكن كمان يا صديقتي ما الك حقّ تقوليلي فهمي للإسلام قاصر وتحولي الردود لردود شخصية، لأن انا متأكد اني بعرف أكتر من القرضاوي، وبكل غرور، لأن بالنهاية الاسلام مش طلاسم ما بيقراها إلا المعمّم، الكتب والتاريخ موجود بين ايدينا يا كوفيّة وعنا عقول منعرف نقرأ عبرها.
الردّ على النقاط اللي ذكرتيها حضرتك بيستوجب موضوع كامل، ما بعرف اذا انتي مقتنعة فيها عنجد. المرأة متساوية مع الرجل والذمي متساوي مع المسلم بالإسلام؟ شو بعد بدّي ردّ بعد هالخبصة؟
كمان عادة ما بناقش شخص بيعتبر انو فهمي قاصر لأن هيك بلّشتي النقاش بقلّة احترام لعقلي ولمعرفتي، بس ماشي الحال.
2- كيف القرآن لم يدعو لقتال الكفار؟
وهالآيات من وين جايي؟ دارسها وحدة وحدة وكلها آيات غير شرطية، يعني غير مقيدة بمكان وزمان:
– قَاتِلُوا الَّذِينَ لاَ يُؤْمِنُونَ بِاللَّهِ وَلاَ بِاليَوْمِ الآخِرِ وَلاَ يُحَرِّمُونَ مَا حَرَّمَ اللَّهُ وَرَسُولُهُ وَلاَ يَدِينُونَ دِيْنَ الحَقِّ مِنَ الَّذِينَ اُوْتُوا الكِتَابَ حتى يُعطوا الجزية عن يدٍ وهم صاغرون ( التوبة/29 ).
– يَا اَيُّهَا النَّبِىُّ جَاهِدِ الكُفَّارَ وَالمُنَافِقِينَ وَاغْلُظْ عَلَيْهِمْ وَمَأْوَاهُمْ جَهَنَّمُ وَبِئْسَ المَصِيرُ (التوبة/73) .
– “واقتلوهم حيث ثقفتموهم وأخرجوهم من حيث أخرجوكم والفتنة أشد من القتل”. (سورة البقرة الآية 191.)
– و”فليقاتل في سبيل الله الذين يشرون الحياة الدنيا بالآخرة ومن يقاتل في سبيل الله فيُقتل أو يَغلب فسوف نؤتيه أجراً عظيماً”. (سورة النساء، الآية 74).
-“سألقي في قلوب الذين كفروا الرعب فاضربوا فوق الأعناق وأضربوا منهم كل بنان”. (سورة الأنفال آية 12).
– “فإذا لقيتم الذين كفروا فضرب الرقاب حتى إذا أثخنتموهم فشدوا الوثاق فأما منّاً بعد وأما فداء حتى تضع الحرب أوزارها”. (سورة محمد الآية 4).
– “فإذا انسلخ الأشهر الحُرم فاقتلوا المشركين حيث وجدتموهم وخذوهم واحصروهم وأقعدوا لهم كل مرصد فإن تابوا وأقاموا الصلاة وآتوا الزكاة فخلوا سبيلهم إن الله غفور رحيم”. (سورة التوبة الآية 5).
3- أما قصة الإله هو إله كل الأديان فاسمحيلي ما وافقك، يمكن الإله الابراهيمي الغيّور والغاضب هو نفسه باليهودية والمسيحية والاسلام فقط، إله بيغضب اذا الواحد شرب وبيغضب اذا الواحد ما سجدله وبيغضب اذا الواحد فطر وبيجيز زواج بنت التسعة، شو هالاله المعاق هادا.
وبالنسبة لتساؤل الجنة والنار اللي حضرتك حكيتيه عنّك، يا كوفية هادا اللي انتي بتحكيه مش اللي بيحكيه رجال الدين اللي عم تستشهدي بأقوالهم.
4- أما تشبيه المقاومة بفلسطين بتكتيكات الرسول الحربية، فمش زابط، لأن المقاومة هيي مقاومة مش نبي جايي يدعي الناس للرحمة وحامل بالايد التانية سيف. بعدين اذا قارئة التاريخ الإسلامي منيح، بتعرفي انو الرسول نفسه خرق قواعد الحرب الاسلامية، والجيش الاسلامي قام بقتل أسرى، وقام باغتيال شعراء ومنهم نساء وشيوخ، فضلاً عن قيامه بسبي النساء وأخذ الناس كعبيد. راجعي السيرة.
5- تبرير حروب الردّة عندك بيبرهن وجهة نظري. الدين مش لعبة، الدين كذبة، وما حدا الو حقّ يحاسب التاني اذا قرّر بيوم من الايام ما يآمن فيها.
6- مبلى بيقلّي.
7- المرأة في الإسلام هي ألماسة ومش نجاسة؟ لكان تفضلي خبريني ليش تعدد الزوجات وليش الحجاب وليش فكرة العورة وليش شهادتها نصف شهادة رجل وليش نصف ميراث وليش ما فيها تصلّي اذا بدورتها الشهرية؟ اذا ألماسة ليش ما فيها تكون رجل دين؟ وليش الزواج هو صفقة تجارية؟ وليش على التسع سنوات بيجوز زواجها؟
8- هادي وجهة نظرك انتي يا كوفية ومش وجهة نظر غالبية رجال الدين.
9- الرسم والنحت حرام اذا موضوع الرسم هم حيوانات أو ناس، والقرضاوي من المحرّمين، لأن ما بيقدر يتخطّى القرآن بهالموضوع. الموسيقى مش حرام عند الكل، لكن كل رجال الدين عندهم اجماع على كراهيتها والتحذير من “مخاطرها”.
10- تفركيلي دينتي؟ انتبهي شو عم تحكي يا كوفية احلى ما يطلع منّي كلام ما رح تحبّيه. ممنوع المرأة تغنّي، روحي اتأكدي من النصوص والفتاوى وكل الاجتهادات، وفيها كلها ممنوع المرأة تغنّي لجمهور من الرجال، تأكّدي وارجعي ردّي عليي خبر.
11- كيف ركبت معك هالجملة؟ انتي جاوبتي على حالك.
12- فيه حال ما بتعرفي، الرسم والنحت لذوات الأرواح حرام، ومصير المصوّر هو في النار، ومش بس هيك، هو أشد الناس عذاباً في النار. اقرأي هادا الشي اذا حابة تعرفي أكتر: https://saghbini.wordpress.com/2010/01/14/%D8%A7%D9%84%D8%A8%D9%8A%D8%A7%D9%86%D9%88-%D8%A7%D9%84%D9%85%D8%AD%D8%B1%D9%91%D9%85/
13-الإسلام بينادي بالعلم؟ : )
فيه يبلّش بقبول نظرية النشوء والارتقاء لكان.
بعدين لمن يكون فيه عنّا آيات قرآنية بتنقض آيات تانية، يعني بتسقط عن القرآن ككل فكرة انو صالح لكل زمان ومكان، لأن بتدلّ على ضرورة التطوّر مع الزمن.
14- مين قلّك بدّي تغيري دينك؟ ومين قلّك بغير أديان المرأة عندها حقوق أكتر؟ الإله الابراهيمي عندو عقدة نفسيّة فيما يتعلّق بالمرأة، لازملو طبيب نفسي للعلاج، لكن للأسف فيه أديان على شاكلته وورثت منه نفس المشكلة. وهالنقطة مكررة. حلوة هيدي، المرأة لازم تكون محجبة، لازم تكون مطيعة، فيه الرجل يتزوج عليها، وفيه يحرمها من الوراثة ومن أطفالها، وفيه يطلقها ساعة اللي بدّو، واذا راحوا على المحكمة شهادتها نصف شهادة، ومنرجع منقول عندها حقوقها كاملة.
15- مين قال الجنس حرام؟ بس عم بلفتلك نظرك انو كلمة نكاح مارقة أكتر من كلمة حرية، وهيدي بتدلّ على نفسية كاتب النصّ وعلى شو كان مركّز بالحياة.
16- مين انتي لتصنفي الناس؟ شو الك معهم اذا بوذيين أو ملحدين أو وثنيين؟ بيضلّو احلى بكتير من اللي حاملين عصاية الدين ولاحقين العالم فيها.
17- بتعرفي شو، هات لنزتّ كل شي فينا سيء على العادات والتقاليد، ونتوهّم انو كل شي منيح هوّي بالدين، ونتظاهر كأن التنين مش مرتبطين ببعض.
18- مش بس كنت قرد، كنت فيروس صغير، وهادا العلم اثبته، اذا انتي مش مصدّقة مشكلتك لكن العلم انهى النقاش فيها. أما بالنسبة لعالم الجنّ موجود، فحظ موفّق بالاتصال فيه.
والآية اللي عن الجنين تم اثبات أغلاطها بالمناسبة، لازم تجتهدي أكتر بالبحث وتعتمدي على مصادر غير زغاليليو النجّار.
بعتقد يا كوفية انو مش حقك تفترضي كل واحد مش من رأيك يعني معرفته قاصرة، يمكن يكون بيعرف أكتر منّك بكتير ويمكن يكون بيعرف أقلّ، لكن بدّك تتقبّلي فكرة انو فيه ناس تانية عندها رأي مختلف عنّك.
كمان ما تزعلي منّي، لكن ردّك فيه قلّة احترام لأنك افترضتي اني جاهل لمجرّد اني بختلف معك بالرأي.
ولأني صديقك عم بتمنى انك توصلي بيوم ما لمرحلة أفضل بتقبّل غيرك.
وبالنهاية، خلّيني خبرك انو الاديان راحت واجت ونحنا بقينا، الناس اللي عقولها حرّة واللي ما خدعوها الأنبياء، كنّا موجودين قبل الأديان السماوية، وضلّينا موجودين معها، ورح نبقى موجودين بعد انتهائها، ونهايتها قريبة.
تحياتي
قريباً، ع قولتك، الاديان إلى المتاحف!
صباح الخير
مش عم حولها لشي شخصي انا أبعد ما يكون عن هيك أمور اللي بسمعك بفكر انو انا واياك متخانقين. انت بتعرف اني بحترمك كتير . ومستحيل فكر بهيك شي.ولو يا طوني يعني 🙂
بس كتير بنقهر وقت تاخد جانب وماتاخد جوانب أخرى. كان قصدي وين الموضوعية يا طوني؟ يعني بتجيب آية بتحكي عن القتال بس في آيات بتحكي عن السلم ليه ما ذكرتها ؟ في بواعث للقتال ليه ما حكيت عنها؟ في اسباب للقتال ليه ما ذكرتها؟
اكيد الاسلام مش طلاسم. بس الاسلام فاتح باب الاجتهاد. هيدا قصدي.
1- مش خبصة. بس فهمني كيف يعني فيه حقوق اقل من حقوق؟ يعني من اي ناحية انا ما قدرت استوعب؟ يعني حدد الجانب اللي بتحكي عنو بالحقوق عشان اقدر استوعب؟ انا بعرف حقوق الذمي كاملة بالدولة الاسلامية. بحقلو يبيع ويشتري وبحقلو يشرب خمرة وياكل لحم خنزير وبحقلوا يتملك وكل شي بمارسوا ضمن نطاق دينو بمارسوا بالدولة الاسلامية وفس ادلة كتير متل : ( من آذى ذمياً فأنا خصمه ) ( من قتل معاهداً بغير حق لم يرح رائحة الجنة ) ( أوصيكم بذمة الله فإنه ذمة نبيكم و رزق عيالكم ) ” لا إكراه في الدين ” ( أموالهم كأموالنا ودماؤهم كدمائنا ) وكتير ادلة غيرها لو احكي من هون للصبح ما بخلص فكيف حقو منتقص؟ والمرأة بحقلها تتملك وتورث ومتساوية في الكرامة الانسانية مع الذكر. ومطلوب من زوجها يعاشرها بالمعروف وينفق عليها الخ الخ الخ. بس انت حدد جوابك لحتى اعرف جاوب. يعني بالحقوق التالية ما في مساواة.
ما كان قصدي قلل من احترامك عكل حال وازا فهمت انت هيك فانا اسفة.
بالعكس طوني انا بستمتع بالحكي معك . انا بستفيد وانت بتستفيد.
2-وهدول شو معناهم ؟
” وإن جنحوا للسلم فاجنح لها وتوكل على الله ”
” فإن اعتزلوكم فلم يقاتلوكم وألقوا إليكم السلم فما جعل الله لكم عليهم سبيلاً ”
” لا ينهاكم الله عن الذين لم يقاتلوكم ولم يخرجوكم من دياركم أن تبروهم وتقسطوا إليهم إن الله يحب المقسطين ”
( يا أيها الناس لا تتمنوا لقاء العدو وسلوا الله العافية)
( تألفوا الناس وتأنوا بهم، ولا تغيروا عليهم حتى تدعوهم، فما على الأرض من أهل بيت من مدر ولا وبر إلا تأتوكي بهم مسلمين أحب من أن تأتوني بأبنائهم ونسائهم وتقتلوا رجالهم )
( فمن اعتدى عليكم فاعتوا عليه بمثل ما اعتدى عليكم ) < لاحظ انو بمثل .
" وأفوا بعهد الله إذا عاهدتم ولا تنقضوا الإيمان بعد توكيدها )
ماشي في قتال بس القتال إلو اسباب ، يعني في بواعث متل رفع الاعتداء عن المسلمين وديارهم وأمولهم، ومتل وجود ناس بمنعوا وصول الدعوة، ومتل وجود جماعات بتعمل على نشر الفتنة. وما في بالدولة الاسلامية اشي اسمو غذر او قتل من دون علم. في فالبداية دعوة للدين، وفي معاهدات وفي قواعد شرعية للقتال سبق وذكرتها بردي الأول.
جيبلي دستور بشري او دين آخر بتسامح مع الاعداء بهالطريقة !!!سواء من ناحية الاسرى ياللي رح احكي عنها بعدين او من ناحية كيفية القتال.
أميركا رمت قنبلة على اليابان عجبت عليها، اليهود عملوا مجازر لشبعوا،
3- هل الاسلام هوي حكي رجال الدين مثلاً ؟ ما عنا نحنا قرآن وسنة نقرأهم ونفكر فيهم ؟ ولا لازم ناخد بس شو بقول رجال الدين ؟
من يجيز زواج بنت التسعة ما بعتقد انو الو دخل بالاسلام. يعني منطقياً وعقلياً واخلاقياً الأمر غير مقبول. بس ما جاوبت لمن قلتلك انو بأميركا نسبة انجاب البنات تحت السن القانوني أكبر من البلاد العربية بكتير ؟
بعتقد في فرق كتير كبير بين الناس اللي عاملة حالها رجل دين هالايام وبين علماء الدين قديماً.
4- بداية متى بدأ القتال ؟ الرسول كان يدعو لمدة 13 سنة بمكة ولا مسك سيف بهداك الوقت ؟ والدعوة بالمدينة كانت 10 سنوات. يعني 13 اكتر 10 سنين !وبعدين ليش ما بلش يقتل بالناس طيب من هداك الوقت ؟ هل الاسلام دين سيف فعلاً؟ مش قادرة اتخيل ، منطقياً هذا غير صائب لانو ببلاد كتير الاسلام انتشر نتيجة لأشياء كثيرة لا دخل لها بالحروب. الرسول بالمدينة قديش آذوه اليهود بهداك الوقت ؟ حتى في قصة لمن راحوا بدهم يقاتلوا وسمعوا الاذان هناك رجعوا لأنو عرفوا انو في جوا ناس مسلمين ، حروب الرسول عليه الصلاة والسلام كانت لعد ة أسباب، اما لمواجهة عدوان، او رد اعتداء او القضاءعلى الخطر قبل تفاقمه.بتقدر تقرأ العلاقات الدولة في الاسلام للزحيلي.
قرأت كتاب سيرة من شي سنة. بتذكر بغزوة بدر وقت اخدوا اسرى خلوهن يعلموا المسلمين. بعدين انت عم بتقول عن قتل الاسرى والنساء . عندك دليل ؟ انا بتذكر هاي الاية : ويطعمون الطعام على حبه مسكيناً ويتيماً وأسيراً " فلا يجوز للجندي انو يقتل الاسير ولا انو يتم التفريق بين الام وولدها او الاخ واختو او الاخ واخوه . ولازم يطعموهم ويعتنوا فيهم صحياً. ما بعرف هلا ازا بتعرف شو بصير بمعتقلات اليهود وشو بيعملوا بالفلسطينية او شو بيعملوا حتى العرب بالمساجين عندهم اللي هما اصلا مسلمين بس بطقوا الدين بشغلات وشغلات.بنفس الوقت لا يجوز إيذاء الاسير نفسياً. بتقدر بهالنقطة ازا حابب تتعمق تقرأ تفسير ابن كثير الجزء الرابع .او منتخب كنز العمال من مسند احمد الجزء الثاني.
ما في رحمة وتسامح بهالشي ؟ جاوبني ؟
5- طب ازا الشخص دخل بدين عن قناعة ليش يفوتوا ؟
6- ليش بقلك؟
7- تعدد الزوجات اجا لأسباب كتيرة. اول شي التعدد مش على كيف الواحد. التعدد بصير وقت تمرض زوجة الشخص او يصير فيها شي وما تقدر تلبي رغبات الزوج. وقتها بدل ما يطلقها بيتزوج غيرها بدل ما يوقع بالحرام. او في حال كانت الزوجة عقيم والرجل بدو ولاد بدل ما يطلقها بيتزوجج عليها. او وقت يصير بينهم مشاكل والتنين يكرهوا بعض ونفرض البنت ما الها حدا بدل ما يطلقوا بيتزوج. او بسبب زيادة نسبة النساء على الرجال وفي كتير بنات بكون نفسهم يتزوجوا. بتقدر تلاحظ كمان انو بأوروبا لانو الزواج بأكتر من وحدة غير مسموح الزنا منتشر. وما بعرف لو قرأت روسيا بشو فكرت، روسيا من فترة من شي كم شهر قالت انو بفكروا يخلوا التعدد مسموح عندهم.
بالنسبة للمثيرات. مش دايماً النُص بتاخد. فيك تقرأ هاي الاية ( وإن كان رجل يورث كلالة أو امرأة وله اخ أو اخت فلكل واحد منهما السدس ) . هي هون بتاخد السدس متلها متل اخوها؟ فكيف صار بس النص ؟
الحجاب اجا لحتى ما تكون المرأة مجرد متعة. يعنيما بعرف شو الحلو بأنو المراة تنزل على البحر مشلحة .
عمر التسع سنوات سبق وجاوبت عليه اكتر من مرة.
الزواج صفقة تجارية؟ هلا الناس اللي بتعمل هيك. العادات والتقاليد مش الدين. هنالك مهر ومن حق المرأة تاخدوا وهو عبارة عن هدية ( حط الف خط تحت هدية ) من الرجل للمرأة. بس الناس صارت توازن كترة المهر بقيمة المرأة وصارت البنت كأنها سيارة بتنباع.
رجل دين؟ انا بعرف انو المرأة ما بحقلها تتولى رئاسة بس.
8- الدين مش بس رجال الدين. كتير ناس بسموا حالهم هلا رجال دين لأسباب معينة وبس بكون همهم يكفروا الناس وياخدوا مصاري.
9- ذوات الارواح هوي الحرام.
10 – هيدي مزحة. واسفة ما كنت بعرف انك ما بتلقى مزح طوني 🙂
انا ما قلت المرأة تغني لجمهور من الرجال. كان قصدي الغناء بشكل عام.
11- المرأة لازم تكون محجبة.
12- ايه قلتلك فوق انو لذوات الارواح بس. بس بشكل منطلق ما فينا نحكم انو الرسم حرام او النحت او التصوير حرام.
13- اول اية بالقرآن نزلت : إقرأ. هيدي بتكفي.
الرسول كان يطلب من زيد بن حارثة ويحث عليه انو يتعلم لغات. وهيدا علم برضو. اكتشافات المسلمين كتيرة زمان وهاد نابع من الاسلام.
بالعكس هوي صالح لكل زمان ومكان لأنو الدين الوحيد المرن وقادر على تطويع نفسو مع كل زمن.
14- انت قلت بردك الاولاني " المرأة بكلّ الأديان عندها حقوق أكثر من الحقوق الموجودة بالاسلام واليهودية، " انت اللي قلتلي يعني لهيك استفسرت.
كل سفينة والها ربان. الأسرة متل السفينة لازم يكون الها قائد والرجل قائدها. وطاعة الزوج من الادب يعني. والرجل المفروض يكون حسن المعشر وخلوق وقادر على الانفاق عليها. يعني كل واحد فيهم عليه حقوق وعليه واجبات الأمر لا يقتصر على المرأة لوحدها.
فيك تجيبلي دليل على انو بيقدر يحرمها هيا واطفالها من الورثة ؟
شهادة المرأة نصف شهادة الرجل؟ انت عم تسقط بنفس سقطة الميراث. لأ مش دائماً شهادتها نصف شهادة الرجل. بكون هادا بالمعاملات المالية فقط لأنو المرأة ما عندها علم كافي متل الرجال بهيك مواضيع. لكن شهادتها كاملة بمواضيع تانية .
بالنسبة للطلاق يعني افهم انو انت مع عدم وجود الطلاق ؟ طيب ازا وصلوا الشخصين لمرحلة صار العيش فيها مستحيل مع بعض ؟ ما يتطلقوا ؟
15- مش عم قول حرام. بس قصدي ما في اي شي غلط انو ينذكر الجنس بالقرآن كونوا غريزة وشي طبيعي متلو متل اي شي تاني.
16 – مش عم صنف الناس يا طوني. كل واحد حر بدينو انا ما دخلني بس مش حلوة فكرة : تعالوا شوفوني يا عالم انا صرت بوذي. طب شو نعملك يعني ازا صرت؟ هيدا كان قصدي 🙂 ما عندي مانع فوت واقرأ لأي شخص مغير دينو او شخص لاديني بس يكون منطقي ومش مراهق . وجربت بالمناسبة كتير من أكتر من مكان فوت على مدونة لاديني صديقك وما نفع معي ولا مرة. مدونتو محظورة.
17- يلا 😀 يمكن مرتبطين بس انا بشوف انو التقاليد ازا بتتعارض مع الدين مش رح امشي معاها.
18- العلم قابل للتغير . كانوا يقولوا زمان انو الكوليرا بتنتقل بالهوا. بس بعدين تغير هاد الحكي. فيك تجيبلي دليل اثبات انها غير صحيحة؟ ( تبعت الجنين تكوين قصدي ) دورت ما لقيت شي مغلوط عن تكوين الجنين، يمكن ما عرفت دور.
يا طوني انا ما بزعل من اي حد بيختلف معي. بالعكس انا بحترم وبحب اللي بيختلف معي اكتر من اللي بوافقني بالرأي، لأن نحنا مش ببغاءات عم بنهز راسنا . بس لمن تقلي انو المرأة بتاخد نصف الميرات وفيها اية قرآنية بتوضح انو فيها تاخد السدس بحالات اخرى وانت ما ذكرتها . ولمن تقلي المرأة شهادتها نصف شهادة ارجل رغم انها بحالات معينة برضو وانت ما ذكرتها. ولمن تقلي زواج ال 9 سنين وتقلي رجال الدين مش هيك بيحكوا. انا بدي اعرف مين خول رجال الدين انو يكون الدين بس الهم ؟ هي الدين مرتكز بس عليهم.؟ ونحنا شو دورنا؟ نسمع ونهز راسنا؟ طبعاً انا بحكي عن رجال دين اليوم.
انا دائماً بعتبر حالي جاهلة والناس بتعرف أكتر مني. ما عمري قلت اني بعرف اكتر من الناس.
ولاحظ انو ردك فيو تقليل احترام الي رغم انو في شغلات وقت كتبتها كنت عم امزح فيها من مبدأ الصداقة ومبينة انها مزح بس ما بعرف ليه هيك عصبت يعني.
وانا بعتذر ازا ردودي بمدونتك بتدايقك .
سلام
يا ويلاه شو بالك طويل :p
ما بيضايقني ردّك أبداً يا كوفية، بالعكس بنبسط بالنقاش معك، لكن أكيد بيضايقني انك تنطلقي من نقاشك من اني جاهل أو اطلاعي “قاصر” حسب تعبيرك. وانتي من اللحظة اللي كتبتي فيها هالاشي فقدتي انتباهي، يعني أكيد مش رح فكّرها مزحة بعد ما توصفي فهمي انو قاصر.
هلق مش هالأزمة، هوّي الكلام المكتوب بيبيّن حادّ أكتر من لو كنا عم نحكي مباشر.
النقاط اللي حكيتي فيها بالردّ الأخير بعتقد رادد عليها بالردّ اللي سبقه وما فيه ضرورة ارجع كرّر نفس الكلام. كمان من اللحظة اللي دافعتي فيها عن وجوب طاعة المرأة لزوجها تيقّنت انو وصلنا لمكان مسدود.
كمان كلمة ذمّي بحدّ ذاتها هي إهانة، انا ما بتعنيلي اشي كون كل الأديان السماوية شايفها خرافات بخرافات، لكن في حال ما بتعرفي عم خبرك.
مش حجّة انو اضطرّ الرسول يابا يحمل سيف، كان فيه ما يحمل لو رسول سلام، غاندي أفضل منّه عشرات الأضعاف من هالناحية. بوذا أهم منّه ومعظم الانبياء حول العالم أهمّ منه لأن ما لجأوا للسيف لفرض أفكارهم. لولا السيف، ما كان الإسلام دخل مكة ولا كنّا سمعنا فيه ولا كنّا اليوم عم نتناقش بهالمسألة.
مش عم قلّك انو كل مشاكلنا سببها الأديان، ولا انه الدين الإسلامي كلّو على بعضه مش منيح، لكن بدك تكوني قادرة تشوفي الوجهين. يعني مثلاً، كيف دين رحمة وفيه آيات قتال متل ما فيه آيات سلام؟ شو هالتناقض هيدا؟
اذا دين بيقاتل، هيدا مش دين، هيدي أيدولوجية سياسية. وإذا نبي حامل سيف هادا مش نبي، هادا قائد سياسي.
يمكن تلاقيني شوي حادّ بالردّ، وبعتذر اذا ضايقتك، لكن كمان يا كوفيّة ما فينا ما نكون غاضبين لمن يكون الدين سبب لمصايب كتيرة وناس عم تفجّر حالها بالأسواق وقمع وظلم وفتاوى مضحكة ونحنا نازلين فيه تجميل وتبرير بدل معالجة المشكلة ووضع الاصبع على الجرح.
اللي عنجد بيهمّو مصلحة دينو ما بينكر عيوب هالدين، بالعكس بيعترف فيها ليقدر يعالجها، مش بيقعد يدافع عن حدّ الردّة وعن مبدأ الذميّة وعن انو الرجل قوّام على المرأة، هلقد صعبة ينقال حدّ الردّة غلط بزماننا ولازم يكون فيه رأي صريح برفضه؟ هلقد صعبة تقولي انو مبدأ الذميّة مبدأ متخلّف وتمييزي وغير عادل ويجب رفضه بكل وضوح؟ هلقد صعب تقولي انو الإسلام لم ينصف المرأة لأنه ولد بصحراء ذكورية لا مكان للمرأة فيها سوى في الخيمة؟
ماشي الحال. الاختلاف ما بيفسد للودّ قضية.
lol
انا ردي مش حاد. انا بريئة كتير الله يسامحك. يعني يمكن الواحد بس يقرؤوا بفكر انو حاد بس انو عادي .
ايوا لو كنا بنحكي عادي ما كان حد فهم التاني غلط. لهيك بكره شي اسمو ماسنجر :S
انا مش عم قول انو المرأة بس لحالها لازم تطيع زوجها. يعني الزوج عليه حقوق أكتر منها. بس لانك ذكرت هيديك النقطة فرديت عليها.
لا بالعكس طوني مش عم اتدايق بالعكس. بس الناس اللي عم بتفجر حالها، المضحوك عليهم وراحوا وفجروا برج التجارة ( بالمناسبة احضر سلسلة 11 سبتمبر تبعت سري للغاية بتكتشف انو الدين دائماً بتم استغلالو لفرض شغلات معينة ) ، الفتاوي المضحكة هيدي بتصدر من ناس ما عندها علم بالدين وبتتخبى تحت ستار الدين بس منشان تمرق شغلات معينة . يعني وقت حد يقول لازم السواق يرضع من المرأة اللي بياخدها كل يوم ع الشغل او عالمكان الفلاني مش بكون واحد مختل ؟ وقت حد يقول انو ميكي ماوس حرام ؟ وقت واحد يقول الرياضة العنيفة حرام ؟ قيادة السيارة حرام ؟ عدم تغطية الوجه حرام ؟ ومرة سمعت واحد بالراديو بقول انو المرأة تلبس بنطلون كمان حرام حتى لو فوقو تنورة ، قال شو ، قال تشبه بالاجانب 😀
مرة كنت عم بحكي مع بنت سعودية عن النقاب ، هيي متنقبة ولأنها بالسعودية مفروض عليها فرض يعني، وطلعت كل البنات اللي ما بغطوا وجهم من الدين رغم اني متأكدة انو جواها هي رافضتو.
لمن تشوف بلد متل السعودية ويكون فيها الحجاب مفروض فرض وبتلاقي بنات الطبقة العليا اللي هي المفروض انها فارضة هاد القانون بس يطلعوا ع اميركا بكونوا لابسين لبس متل اللي بيلسبوا الامريكان بختل توازن الدين عند الواحد ؟ اي دين بنادي انو الطبقة العليا حرة والعامة مفروض عليها الحجاب فرض ؟ هني حرين يلبسوا شو ما بدهم بس لا عاد يفرضوا اشيا على الناس.هاي الاشياء كلها خلت الناس تنظر للدين بطريقة غلط.
بالنسبة لقتل المرتد حالياً أكيد مش رح يتم تطبيقو. بتم تطبيقو لمن يكون في دولة اسلامية بس . وبالنسبة لمبدأ الذمي، حكيت قبل كتير عنو وما شايفة غلط فيو عليه حقوق وعليه واجبات متلو متل اي شخص تاني بالدولة. وبالنسبة للمرأة كمان ما شايفة فيه اي غلط بحقوقها. الغلط بتعامل الناس هالأيام بس . الواحد بحب يحبس مرتو بالبيت ، بشوف انو صوتها عيب، وبشوف انو اسمها عيب وانو وجها عيب وبصير يقول هيك الدين وهوي الدين مش هيك. انا دارية. بضل هيدا بالنهاية هاد رأيي .
سألتك عن اشيا فوق ذكرتها انو تعطيني دليل عليها ما جبتلي :O
أكيد : )
كوفيه
قلتي شيء كارثي وخطير ضمن الكلام
قلتي ان العقوبات الدينية المزعومة رادع للناس كي لا ينتشر الفوضى
لو اتكلمنا عن السرقة مثلا فهنا فمصر اكتر اوقات السنة سرقات قبل عيد الفطر والاضحى يعني في رمضان وكذلك اكتر حالات التحرش الجنسي من السنة بعد الافطار وفي الاعياد والمواصلات العامة وللمحجبات اكثر من غيرهن لدرجة اني لا اخرج من بيتي طول الاعياد ولو حدث فاتحرك بالسيارة ويجب ان اطلب من اخي التواجد معي حتى باب السيارة مع العلم اني اسكن باحدى الاحياء الراقية
((على الهامش :
حكت لي صديقة محجبة ان اهم ادوات حمايتها دبوس الطرحة واكتشفت انه شيء شائع بين المحجبات فلان التحرش بالنساء في الاتوبيسات والمواصلات العامة روتين يومي معهن فدبوس الطرحة هو سلاحهم الوحيد والصامت يشكون به اصابع الرجال التي تتحسسهم :: فعلا هنا الحجاب حامي و الاسلام رادع ))
وهكذا كان يحدث في المدينة ايام النبي لذا امر الحرائر بالحجاب لكي لا ينقض عليهم شباب المسلمين المتسكعين .. مش عشان الحجاب حامي او رداء عفة فحيبصولها ويقعوا على الارض من الهدى المفاجيء لا عشان يعرفوا ان وراها رجل وقبيلة ياخدوا بتارها فيخافوا يقربولها .. الحقيقة ونعم
يعني الاسلام حل الموضوع بانها تبين ان ليها رجال فخوفا منهم يبعدوا مش خوف من نبي ولا اله
يعني لو واحدة عزباء مثلا وليس لها رجال او عزوة حتبقى ملطشة اللي رايح واللي جاي يتحرش بيها
القانون والحقوق المدنية والانسانية هي الامان في المجتمع وليس خوف وهمي من عقاب ما سيحدث بعد موتي .. مافي مرة شفت لقاء مع مجرم قد ردعه عقاب اخروي عن فعله لكن مايردعه هو القانون الذي وضعه بشر ونفذه بشر
اهلا هبة
مصر بداية ليست دولة إسلامية . لذلك لا تستطيعين أن تقومي بفرض قانون معين أو إخراج فرضية معينة عن المصريين. بمعنى : هل سيتهم أي مصري أن اليوم هو العيد كي لا يقوم بالسرقة ؟ هل العيد يعني له شيئاً إن لم يكن مسلماً؟ هل المسلمون لا يسرقون؟ هنالك العديد من الأشخاص تحمل هويتهم اسم مسلم وهم لا يمتون له بأية صلة.
اذاً لا شأن لرمضان ولا العيد بالسرقة او بالتحرش الجنسي. المشكلة في الدولة نفسها. وإن كانت نسبة التحرش في مصر كبيرة فهذا لا يقع على الاسلام. هذا يقع على الشرطة وأسباب اجتماعية أخرى.
بالنسبة للهامش فأنا أيضاً لا أملك أي معلومات عن التحرش في مصر رغم إيقاني الشديد بكثر السرقة وارتفاع نسبة الجريمة والتحرش في مصر ( لا أملك معلومات ولكن من الأخبار المتفرقة اليومية في الصحف ) ، ونعود هنا لأمر لماهية الحجاب الذي تلبسه صديقتك، هل هو يتمثل في خرقة على الرأس؟ أم في لباس فضفاض وساتر ولا يصف ولا يشف إضافة إلى الأخلاق ؟
وبهذه المناسبة أنا أعرف بنت منقبة، تقوم بوضع طن مكياج على عيونها وعدسات كبيرة جداً ويلاحقها الشباب طبعاً هي مبسوطة على الوضع فهل نلوم الحجاب هناك؟ هل نلوم الإسلام؟
وأعرف فتيات كثر متحجبات وجميلات جداً ولا يقترب منهن أحد . وإن حدث واقترب ليس هنالك من وسيلة سوى التطنيش . ولا أعرف إن وجدت خدمات معينة عندكم في الشرطة لمثل هذه الحالات.
عموماً أنا لاأملك أي معلومات عن مصر لذلك لا أستطيع أن أفتي.
هل حقاً هذا ما كان يحدث في المدينة ؟ هل بإمكانك إرفاق دليل مع مصدره لو سمحتِ ؟ لأن الطعن في الأشخاص أمر غير مقبول. هل كان على زمنهم دبابيس ؟ من أي مصنع ؟
شيء آخر، بإمكانك الاطلاق على شباب اليوم من المسلمين متسكعين لان الاسلام صار مجرد كلمة في الجواز لكن على شباب ذلك الزمان؟ أظن بأنه صعب. لا يقتصر الأمر على المسلمين حتى المسيحين وحتى اليهود ، لأن الأشخاص الذين كانوا في بداية أي دين او عقيدة و لم يدخلوها عنوة ولا بالوراثة دخلوها عن قناعة تامة.
وهل لديكِ إحصائية عن أن القانون الوضعي ناجح؟ لو كان القانون الوضعي ناجح لقلة نسب الجريمة في العالم كله.
وأمر آخر، هل بظنك من يقوم بارتكاب جريمة هو مؤمن ؟ إن لم يردعه دينه عن الجريمة أياً كان فهو ليس مؤمناً.
لا تلوموا الدين لوموا البشر وتطبيقهم يا هبة.
في ظل غياب أي تفسير موحد للقرأن الكريم لا نملك الحق في الفصل بين النص والتفسير الخاطىء, فبأي حق نعتبر أن من أفتى بقتل ميكي ماوس لا يمثل النص … ان هذة التفسيرات المتناقضة لهذا النص الالهي هي دليل عقم النص عن تقديم تعاليم واضحة.
وهنا نستذكر كلام نسيم طالب في كتابه الشهير “البجعة السوداء” اذ يعتبر في سياق حديثه عن الأدوات الاقتصادية أنه اذا انطلقنا من حقيقة واحدة لنصل الى استنتاجين متناقضين الأجدر بنا أن نصمت لأننا لا نعلم شيء. والمماثلة واضحة هنا على الصعيد الديني اذ أنه اذا انطلقنا من حقيقة وجود الله (فلنسلم جدلا) نصل عندها الا عشرات الأديان كلها تناقض الأخر, واذا سلمنا بحقيقة الاسلام أيضا” نصل الى استنتاجات المذاهب اللتي تحارب بعضها الأخر, وان سلمنا جدلا بحقيقة القرأن نصل أيضا الاستنتجات متناقضة كما أوضح صديقنا أدون.
اذا” بدل أن نتنافس على التبشير الديني الأجدر بنا أن نصمت بالرغم من اعتقادي بالحاجة الاجتماعية والروحية للأديان كايمان شخصي لا كشريعة تحكن المجتمعز
إذا الفكرة بعد كل هيدا، هيّ المفاضلة بين الأسوأ.. فما بيربح الإسلام، وأكيد ما بتربح العقيدة المسيحية المعاقة، ولا شك إن اليهودية ما بتفوز بأي جائزة.
كوفية
نفسي اعرف انتي بتجيبي مسلماتك منين ماينفعش تمسكي فرضية تاخديها كمسّلمة وتعيشي عليها وعايزانا نصدقها زيك فياريت تفكري شوية بمسلماتك واصلها
يااستاذة مصر 94% منها مسلمين ده غير ان جماعات التكفير والهجرة والمتأسلمين بتشكل 70% او اكتر من المسلمين المصريين
والدليل مقاعد مجلس الشعب الدورة السابقة اللي ذهب كلها ليهم بنسة 65% يمين اسلامي
وبعدين انت من خمس دقايق نظمتى شعر عن اكتمال ورحمة القرآن ودلوقتي بترجعي الغلط للبشر مش النص طيب ما لو التطبيق غلط يبقى النص ناقص يا استاذة وياريت تراجعي رد الزميل Andalus
السابق لكلامك عشان مانكررش ونعيد الكلام
موضوع تحرشات المدينة وانزال الحجاب بسبب ده بالاغلب انا طبعا مش مهتمة احط مصدر لاني مش هدفي اقنع حد باللي انا شايفاه ومش مهتمة بالاقناع ولا بكتب مقالة عشان اوثق المعلومة دي قريتها كتير جدا لاني في البحث ده بقالي سنين مابتفطمش على افكار مش فاهماهه ولا مقتنعة بيها بس عامة انا لمحت المصادر قريب في مقال للصديق لاديني
http://ladenee.blogspot.com/
ياريت ترجعي ليها حيفيدك كتير خصوصا انه مركز على الاسلام في مقالاته ومعلوماته التاريخية موثوقة وموثقة
عفوا يا كوفية بس انت بتعيدي وتناقضي الكلام تاني
يا استاذة المتأسلمين دايما رافعين شعار “الاسلام هو الحل” طيب ما لو هو الحل ليه مانضمش ليه المسلمين بالوراثة دول واتنقلوا لخانة الاقتناع ولو هو الحل ليه الدول الاسلامية “زي مصر” في مزبلة الامم رغم انها ايام الفراعنة “الكفرة” كانت فوق الكل
بلاش ليه امريكا هزمت افغانستان والعراق مثلا مع انهم مسلمين ليه دينهم مانجدهم رغم ان افغانيستان كانت بتطبق الشريعة خصوصا في الحجاب بحذافيرها لدرجة ان مهامهم كلها كانت بتنحصر في شيل الحجاب ووضع الزي الرسمي و……..
عندي احصائيات لقانون وضعي اسألي نفسك السؤال صح : عندك احصائيات لقانون اسلامي تقول ان الامة المسلمة المطبقة معدومة الجريمة
اقلك انا بقى مثالين : سويسرا نسبة الجريمة فيها شبه معدومة رغم انه قانون وضعي وكتير من بلدان اوروبا وليس العواصم وكتير من ولايات امريكا وليس عواصم الولايات وكلهم عندهم احصائيات بارقام مش نظام المسكوت عنه في مجتمعات العرب
وعندنا السعودية : اخر خدمة فتحوها لخط الشكوى من الاغتصاب الاسري وخصوصا للاطفال
وفي موضوع على موقع اللادينيين العرب من سنة موجود احصائية من طرف السعودية عن حالات الحمل من المحارم اللي بتقدر بالآلاف ده غير جرائم القتل اللي بتنتهي على دية مالية وما الى ذلك
بصي ياكوفية عايزة تسودي ناس امحي تفكيرهم خليهم اصنام لوقربوا ناحية اي مصلحة ليكي تقولي حاسب ده حرام قيموا الحد .. الاسلام الدين الوحيد اللي شرع للمسلمين الذين يأسرون ان يتخذوهم كالجواري والعبيد ويفعلوا بهم مايشاءوا .. وهو الدين الوحيد اللي اقام حد القتل على الذين يتركونه.. فعلا ديموقراطية رحمة
على الهامش:
نصر حامد ابو زيد استاذ جامعة مصري اتهموه بالردة وبالتفريق بينه وبين زوجته ده غير رسائل التهديد بالقتل مما اضره للهرب خارج مصر
سيد القمني قد سجن بالسعودية
فرج فوده قتل
…………….
ده ارهاب على مفكريين ده غير الناس العادية
ياريت لو عايزة تعرفي الاسلام اكتر ما تجتريش المسموح من المعرفة اللي كل الناس حافظينه وبيكرروه وسكوت على كده ياريت تدخلي موقع الملحدين العرب
el7ad.org
وتراجعي المكتوب عن نقد الدين الاسلامي وياريت تراجعي العديد من الكتب افتكر منهم
مصادر التاريخ الاسلامي – اسماعيل الادهم
لماذا انا ملحد – اسماعيل الادهم
وهم الاله – تشارلز دوكينز
—————————————————————————-
ملحوظة : اضفت الرد في العام لما سبق من التكرار في ردود الزملاء على الافكار المطروحة ولكي يتابعه المتابعون فلا يعيدوا الكلام نظرا لان الحديث غير خاص
أهلاً هابي.
بداية قبل ردي السابق أنا رجعت لإحصائيات المخابرات الامريكية. ونسبة المسلمين في مصر هي 90% حسب احصائية 2010. لكن انا ردي مش من هون نابع. لمن عم قول دولة اسلامية مش بكون قصدي انو الدولة فيها نسبة مسلمين كبيرة. دولة اسلامية يعني بتخضع لأحكام اسلامية. يعني السارق عقوبتو قطع اليد مش السجن( حتى لا تفتحي موضوع السرقة فمش كل سرقة يتم فيها القطع، للسارق شروط والخوض فيها طويل فيكي على هالاساس تراجعي مواقع اسلامية كتير )، وما فيها بارات وهالقصص وما بكون فيها ابن الواصل بحقلو يقتل وينهب والفقير ما بحقلو يعمل شي وازا عمل بيتعاقب لانو يا حرام فقير. هيدا قصدي مش أكتر. ما حكمت عنسبة المسلمين فيها .
لمن قول تطبيق هيدا بيرجع لأنو الشخص ماخد الدين بطريقة غلط. يعني متل واحد مسلم بس بيشرب خمرة. او واحد مسلم وما بصلي بس بيجي بيقلك التعدد حلال وهاد حقي وبيتزوج وبيرمي مرتو الأولى.
عزيزتي يمكن لو قرأتي ردودي السابقة بتعرفي انو مدونة لاديني مش عم تفتح عندي . وما بحياتي شفت المادة المعروضة فيها. بس بظن انو ردودي مش عم تنقرأ لهيك بتاخدي جزئية وبتتركي باقي الجزئيات.
ابن تيمية قال بما معناه يرفع الله الدولة الكافرة العادلة ويذل الله الدولة المسلمة الظالمة. وبعتقد هاد كافي وبيشرح كل قصدي.
ازا انتي بتفكري انو السعودية بتطبق الدين فانتي عم تضحكي على حالك. الدين لا يعني الكبت. الدين هو اليسر وليس العسر. الدين مش معناه البنت تتخمر داخل البلد وخارج حدود البلد تلبس بكيني. وبعتقد فيكي تراجعي تاريخ الخلفاء وتعرفي كيف كانت نسب السرقة او باقي الجرائم بهداك الوقت. بعدين يا عزيزتي مش عم قول انو القوانين الوضعية غلط، انتي بكلامك هاد عم بتقوليني شي ما قلتو، الناس مش روبوتات، شي طبيعي يكون فيه قوانين وضيعة بكتير أمور وهالنسب شي طبيعي تكون ببلاد متل كندا والنرويج نسبة الجريمة عندن قليلة حسب ما بذكر بس ليه منها قليلة بأميركا كمان؟ او منها قليلة ببريطانيا 😉 .. هيدا ان دل على شيء دل على انو الدول الاخرى كافية سكانها بامور معينة بتخلي الواحد فيها ما يسرق او يقتل يعني عندها قوانين متينة وهالقوانين كونها قوانين بشرية مع الزمن رح تتغيرحسب متطلبات البيئة والجيل القادم، لكن كل قصدي انو القانون الالهي هو عبارة عن قانون ثابت. طبعاً الله مش عم يمنع حد يحط قوانين وضعية 🙂 لكن مش بأمور ثابتة .
من عند جملة : بصي يا كوفية … الخ ما فهمتها صراحة. لو كتبتيها بالفصحى او بلهجة أقرب.
سبق وقلت فيكي تجيبيلي دليل على انو هيك بصير بالأسر ؟ بس ما حد جابلي دليل هذا ان دل على شي دل على انو بس مجرد كلام.
الأسير لا يعامل كالعبد. وما عمري قرأت آية قرآنية او حديث شريف بقولوا خلوا الاسير عبد، إن كان عندك دليل من القرآن او السنة يا ريت تجيبي ، الموضوع عكل حال بطل يتحمل يعني كاريكاتير صغير 😀
بعتقد هاد آخر رد إلي على كلامك لأنو رح نضل ندور بنفس الفُلك. حكيت لشبعت :$ . سلامي عزيزتي
سلام جميعاً،
هنيبعل شكراً على تعليقك رفيق، إلى المتاحف!
أندلس العزيز، مشتاقين صديقي،
ما بقدر ضيف كتير على اللي حكيته لأن موافقك مية بالمية.
كارولينا، معك حقّ، للأسف الدينيين بيعتقدوا ان المنافسة هي حصراً بين الأديان السماوية، كأن اذا قلنا عن خلل في دين معيّن يعني عم نمدح بدين آخر، وهيي هالأديان كلها نابعة من نفس الفلسفة الأساسية، فلسفة التوحيد الديكتاتوري ومنهج التسليم بالمنزل وتصنيف الناس لمراتب وتوزيعها على النار والسماوات.
هبة، كأن كنتي عم تحكي بلساني صديقتي، وكلامك هو عن تجربة مباشرة وضعتيها تحت مجهر عقلك ومعرفتك الواسعة، وكمان ما بقدر اضيف على كلامك غير اني قول عن أسلوبك انه سيف جراحي : )
كوفية العزيزة،
أولاً حابب اعتذر منّك في حال كنت حادّ تجاهك ببعض الأجوبة السابقة والنقاش كان ممتع ومغني ولو مختلفين على المسائل بالمجمل.
بس يا صديقتي برجع بقللك، برأيي مش لازم نضلّ نبحث عن تبريرات للدين، يجب وضع الاصبع على الجرح والاعتراف بالمشكلة، حضرتك عم تنسبي كل الشرور للأفراد وللعادات وللتقاليد وتنسبي كلّ الخير للدين، كأن الدين موجود بمعزل عن الأفراد وكأن مش مساهم بترسيخ العادات المتخلّفة اللي حضرتك عم تعارضيها. بعدين، اذا كان الدين مش قادر يحوّل أكثر من 1 % من الأفراد إلى أفراد أخلاقيين وخيّرين، شو النفع منّه؟ ومش بتبطل مقولة أن الأديان هي حافز أخلاقي للناس؟
تبقي بخير بنّوت
تحياتي
أهلاً طوني مرة تانية
لأ بالعكس ردودك عادية ولو
مش عم دور على تبريرات للدين. بس هيدي قناعاتي وهيك انا عم شوف الدين وان كان حد بشوه الدين لا يقع الخطأ على الدين.
بعتقد حكينا باستفاضة وكل شخص وصل فكرتو للتاني وببقى عكل واحد يبحث أكتر وبتمنى انو كل شخص فينا يصل للصواب يوماً ما.
اصلا ليش فتحت هيك موضوع يعني الاسلام صارلو الف وخمسمية سنة و بشهادة المؤرخين الغير مسلمين كان قمة العدالة, وتفسير الايات بيرجع النا نحنا المسلمين مو الك يعني ممكن فوت انا على شركة مالي فيها شي و قلهون والله النظام الداخلي تبعكون كلو غلط???? انت عملت هيك لما حكيت عن الآيات, انت بيحقلك تدخل لما ندعسلك على طرف وناخد حقوقك, ولا تعذرني حبيبي والاختلاف في الرأي يفسد للود قضية لأنو كان في ود قبل ما تستخدم الفاظ وسخة !! الا لا يجهلن أحد علينا ** فنجهل فوق جهل الجاهلينَ
مرحبا سامو،
أهلا فيك بالمدونة،
بالنسبة لأول سؤال، “ليش فتحت هيك موضوع”، لأن مدونتي وحر فيها وما خصّك لا انت ولا غيرك شو بدي افتح فيها موضوع.
تاني شغلة، اذا كان قمة العدالة بالنسبة الك، طيب هيدا رأيك ومش ملزم لحدا، وبرأيي، اللي ما بيلزم حدا غيري كمان، الإسلام كان ولا يزال عكس العدالة تماماً بشرائعه الصحراوية، تاريخياً وحالياً ومستقبلياً كمان.
أما بالنسبة لجملة “تفسير الآيات بيرجع النا نحنا المسلمين مو الك”، تعا لقلّك يا عيني، لمن يكون فيه دين بأمه وأبوه عم يأثر على حياتك وعلى مستقبلك وعلى أسلوب عيشك، تفسير الآيات والتعاطي ومواجهة أفكاره مبلى بيرجع الي والك ولكلّ حدا عم يتأثر بمساوئه، وكون الإنسان مش مسلم ما بينفي حقّه بإعطاء رأيه بالإسلام والقرآن، تماماً متل كون الإنسان مسلم ما بينفي حقّه بإعطاء رأيه بالمسيحية والالحاد والوثنية وغيرها.
تالت شغلة، لمن بدك تجي تترك تعليق بمدوّنة حدا بدّك تكون محترم الشخص اللي عم تحكي معه، تعليقك طائفي وخاتمته بتوصفني اني جاهل، انا مش قادر علمك الاحترام وكان فيني امحي التعليق بس رح اتركه لأن بيدلّ تماماً على الأخلاق الدينية الكارثية اللي ابتلينا فيها كشعوب وبيدلّ مين الجاهل الحقيقي بيناتنا.
أما اللي شايفه حضرتك ألفاظ وسخة فهو يا عزيزي ألفاظ عادية جداً، اذا كلمات”متل خرافات” و”إله فاشل” شايفهم كلمات وسخة، هيدي مشكلتك وحدك، وبقترح عليك لمن تشوفها تكبس الـ X بأعلى الصفحة وترتاح منها وما تقرا وتجي تتعبنا بالردّ على تعليقات طائفية متل تعليقك.
بالنسبة الي، الكلمات الوسخة هيي “ذمّي”، “مشرك”، “نكاح”، “ضرب الأعناق”، “نجاسة”، “عورة”، وما شابه من الكلمات اللي بتعرف مصدرها.
سلامي
مررت من هنا .. وأعجبني الكاريكاتير والحوار الذي تلاه
سلامي صديقي
مش حجّة انو اضطرّ الرسول يابا يحمل سيف، كان فيه ما يحمل لو رسول سلام، غاندي أفضل منّه عشرات الأضعاف من هالناحية. بوذا أهم منّه ومعظم الانبياء حول العالم أهمّ منه لأن ما لجأوا للسيف لفرض أفكارهم. لولا السيف، ما كان الإسلام دخل مكة ولا كنّا سمعنا فيه ولا كنّا اليوم عم نتناقش بهالمسألة.
…………………………………….
و لنا أن نقرأ ما قاله المهاتما غاندي بنفسه عن ذلك الرسول:
I wanted to know the best of the life of one who holds today an undisputed sway over the hearts of millions of mankind…. I became more than ever convinced that it was not the sword that won a place for Islam in those days in the scheme of life. It was the rigid simplicity, the utter self-effacement of the Prophet the scrupulous regard for pledges, his intense devotion to his friends and followers, his intrepidity, his fearlessness, his absolute trust in God and in his own mission. These and not the sword carried everything before them and surmounted every obstacle. When I closed the second volume (of the Prophet’s biography), I was sorry there was not more for me to read of that great life
أردت أن أعرف صفات الرجل الذي يملك بدون نزاع قلوب ملايين البشر .. لقد أصبحت مقتنعاً كل الاقتناع أن السيف لم يكن الوسيلة التي من خلالها اكتسب الإسلام مكانته، بل كان ذلك من خلال بساطة الرسول مع دقته وصدقه في الوعود، وتفانيه وإخلاصه لأصدقائه وأتباعه، وشجاعته مع ثقته المطلقة في ربه وفي رسالته .. هذه الصفات هي التي مهدت الطريق، وتخطت المصاعب وليس السيف .. بعد انتهائي من قراءة الجزء الثاني من حياة الرسول وجدت نفسي أسفاً لعدم وجود المزيد للتعرف أكثر على حياته العظيمة .
مش متوقّع من رجل سياسي متل المهاتما غاندي اللي فيه ببلده ملايين المسلمين واللي أساس دعوته التحريرية قائمة على المساواة بين مواطنيه إنه يقول الحقيقة عن الرسول، بالإنكليزي فيه اسم لهيك اشيا :
political correctedness، أقرب ترجمة للعربية هي “الملائمة السياسية”.
لو بتخبّرنا انت انه لو بلا السيف شو كان مصير الدين الإسلامي من بداياته لليوم وهل كانت الشعوب وأولهم قريش اعتنقوه بشكل كامل.